Астанада автобуста қызға тиіскен ер адам ұсталды
Астанада қоғамдық көлікте бойжеткенге тиісіп, әдепсіз әрекет жасаған 33 жастағы ер адам әкімшілік жауапкершілікке тартылды. Оқиға кезінде оның алкогольдік масаң күйде болғаны анықталды. Сот құқық бұзушыны 10 тәулікке әкімшілік қамауға алу туралы шешім шығарды, деп хабарлайды Tizgin.kz Астанадағы полиция департаментіне сілтеме жасап.
Автобуста қызға тиісіп, кейін қашып кеткен
Астана қаласы полиция департаментінің мәліметінше, оқиға қалалық автобустардың бірінде болған. Алкогольдік масаң күйде болған 33 жастағы ер адам қоғамдық көлікте келе жатқан бойжеткенге тиісіп, оның санына қол тигізген. Жолаушы ер адамның әрекетіне наразылық білдіргеннен кейін, ол автобустан түсіп кеткен. Оқиғадан соң полиция қызметкерлері күдіктінің жеке басын анықтап, оны ұстады.
«Полиция қызметкерлері алкогольдік масаң күйде қалалық автобустың жолаушысына қатысты заңға қайшы әрекет жасаған 33 жастағы ер адамды анықтап, ұстады», – деп жазылған полиция хабарламасында.
Сот ер адамды 10 тәулікке қамады
Ұсталған ер адам уақытша ұстау бөлмесіне қамалды. Оған жолаушыға қатысты заңсыз әрекеті үшін әкімшілік іс қозғалды. Істі қараған сот құқық бұзушыны 10 тәулікке әкімшілік қамауға алу туралы шешім қабылдады.
Астана қаласының полиция департаменті қоғамдық орындарда мұндай әрекеттерге жол берілмейтінін ескертті. Ведомство өкілдерінің айтуынша, азаматтардан келіп түскен осындай сипаттағы әрбір шағым құқық қорғау органдарының бақылауында болады.
Бойжеткен ер адамды өзі тоқтатуға тырысқан
Еске салайық, 17 қарашада елордалық автобуста бойжеткенге белгісіз ер адамның тиісіп, әдепсіз әрекет жасағаны туралы ақпарат тараған болатын. Жәбірленуші Threads әлеуметтік желісінде оқиғаның мән-жайын баяндаған.
Оның айтуынша, қоғамдық көлікте бейтаныс ер адам өзіне тиісіп, мазасын алған. Бойжеткен қарсылық білдіріп, дауыс көтерген кезде әлгі адам аялдамадан түсіп, қашуға әрекеттенген. Қыз оның соңынан түсіп, тоқтатуға тырысқан және полиция шақырған, алайда ер адам оқиға орнынан кетіп үлгерген.
«Полицияға арыз жаздым. Оны жақын арада тауып, жасаған әрекеті үшін жауапқа тартады деп үміттенемін», – деп жазған бойжеткен.
Оқиға көпшілікке белгілі болғаннан кейін Астананың Нұра аудандық полиция басқармасы тексеру жүргізіп, ер адамның жеке басын анықтауға кіріскен. Кейін полиция қызметкерлері 33 жастағы ер адамды ұстап, сот шешімімен әкімшілік жауапкершілікке тартты.