Ташкентте тәмамдалған Информатикадан халықаралық IOI 2026 олимпиадасында Қазақстан құрамасының төрт мүшесі де жүлде иеленді, деп хабарлайды Tizgin.kz.
Білім бәсекесіне 92 елден 375 оқушы қатысты. Оқу-ағарту министрлігі ақпаратынша, ұлттық құрама 1 алтын және 3 күміс медаль жеңіп алып, әлемдік командалық есепте 10-орынға ие болды.
Бұл – Қазақстан құрамасының олимпиада тарихындағы үздік нәтижелерінің бірі. Астанадағы «Spectrum» халықаралық мектебінің 12-сынып оқушысы Максим Цой алтын медаль жеңіп алып, әлемдік жеке есепте 5-орын иеленді, – делінген мәліметте.
Осылайша ол әлемдегі үздік бес жас бағдарламашының қатарына енді. Күміс медаль иегерлері:
- Алдияр Сейтбай – Астана қаласындағы дарынды балаларға арналған «Білім-инновация» мамандандырылған лицей-интернатының 11-сынып оқушысы;
- Мансур Мамадахунов – Қызылорда облысындағы дарынды балаларға арналған «Білім-инновация» мамандандырылған лицей-интернатының 11-сынып оқушысы;
- Асқар Әкежан – Семей қаласындағы физика-математика бағытындағы NIS-тің 12-сынып оқушысы.
- Қазақстан құрама жетекшілері: Сатылханов Темірлан – Astana IT University бас жаттықтырушысы;
- Қуанышбай Айбар – International University of Information Technology синьор-лекторы.
Былтыр қазақстандық оқушылар 3 күміс және 1 қола медаль жеңіп алып, әлемдік командалық есепте 14-орын иеленген болатын. Осы жылы ұлттық құрама өз нәтижесін төрт сатыға жақсартты. Қазақстандық оқушылар Информатикадан халықаралық олимпиадаға қатысқан жылдар ішінде барлығы 79 медаль жеңіп алды, – делінген ақпаратта.
