Шығыс Қазақстанда жол жөндеу кезінде адамның сүйектері табылды

Шығыс Қазақстан облысында жол жөндеу жұмыстары кезінде адамның қаңқа сүйектері табылды. Алдын ала мәлімет бойынша, сүйек қалдықтары ер адамға тиесілі, деп хабарлайды Tizgin.kz.
Оқиға Өскемен – Риддер тасжолының Радуга елді мекені маңындағы учаскесінде болған. Адам сүйегінің табылғаны туралы алғашқы ақпаратты osa_news_vko Instagram парақшасы жариялап, оқиға орнынан түсірілген фотосуреттерді бөлісті.
Шығыс Қазақстан облысының полиция департаменті аталған дерек бойынша сотқа дейінгі тергеу басталғанын растады.
«Қазіргі уақытта жеке басы анықталмаған адамның кім екенін және өлімінің себебін анықтауға бағытталған іс-шаралар жүргізіліп жатыр», – деп мәлімдеді полиция.
Полиция әлеуметтік желіде тараған марқұмның қол-аяғы байланған деген ақпаратты жоққа шығарды.