TOP-2Қоғам

Қазақ қойылымына қазақтардан басқа ешкім бармайды – Польша елшісі

Польшаның Қазақстандағы елшісі Михал Лабенда қазақ театрларындағы көрермендерге қатысты өз ойын бөлісті. Дипломат Мұхтар Әуезовтің «Қарагөз» пьесасы бойынша қойылған спектакльді тамашалап, актерлердің шеберлігіне жоғары баға берген. Алайда оны қазақ және орыс тілдеріндегі қойылымдарға келетін көрермендердің айырмашылығы ойландырған, деп хабарлайды Tizgin.kz.

Михал Лабенданың айтуынша, ол театрға жиі барады. Жуырда Мұхтар Әуезовтің «Қарагөз» трагедиясын тамашалаған елші қойылымнан ерекше әсер алғанын жеткізді. Дегенмен театрға барған сайын байқайтын бір жайт дипломаттың көкейінде сұрақ туғызған.

«Кеше мен театрға бардым. Мұхтар Әуезовтің «Қарагөз» деген керемет пьесасын көрдім. Өзім театрға көп барамын. Сол кезде менде бір қызық сұрақ пайда болды. Орыс пьесасына барсам, көрермендердің көпшілігі қазақтар. Ал қазақ пьесасына барсам, қазақтардан басқа ешкім жоқ. Яғни басқаларға қызық емес пе деген сұрақ туады», – деді Лабенда.

Сонымен қатар Михал Лабенда «Қарагөз» қойылымының көркемдік деңгейіне ерекше тоқталды. Оның пікірінше, шығарма тек екі жастың махаббатын ғана емес, адамның отбасы мен туған ортасы алдындағы жауапкершілігін де сөз етеді.

«Айтпақшы, қойылым ғаламат, актерлердің ойыны ғажайып. Маған қатты ұнады. Қойылым тек махаббат туралы ғана емес, жауапкершілік, өз отбасына, руына деген махаббат туралы», – деді елші.

Back to top button