«Ордабасы» футбол клубы жекешелендірілгеннен кейін Шымкент қаласының шенеуніктері футболға 1,8 млрд теңге көлемінде мемлекеттік қаражат жұмсамақ, деп хабарлайды Tizgin.kz kaztag.kz-ке сілтеме жасап.
ПОРТАЛДА НЕ ЖАЗЫЛҒАН
Мемлекеттік сатып алу порталында жарияланған лот сипаттамасында: «Тапсырыс беруші – «Шымкент қаласының дене шынықтыру және спорт басқармасы» мемлекеттік мекемесі; атауы – спорт клубтарының қызметтері; қосымша сипаттамасы – 2026 жылғы маусымға футбол командаларын дайындау және олардың қатысуын қамтамасыз ету үшін клубтық қызмет көрсету; жоспарланған сома – Т1 864 224 138», – деп көрсетілген.
Конкурсқа қатысуға өтінім қабылдау 20 ақпанда басталып, 27 ақпанға дейін жалғасады.
Айта кетерлігі, шенеуніктер бұл конкурсты 17 ақпанда – «Ордабасы» ФК жекешелендіру нәтижесінде жеке меншікке өткені белгілі болғанның келесі күні жариялаған.
«Ордабасы» ФК жеке басқаруға өтеді. Келісімге қала әкімі Ғабит Сыздықбеков пен «Integra Construction KZ» ЖШС басшылығы қол қойды. Меморандум мемлекет басшысы Қасым-Жомарт Тоқаевтың кәсіби футбол клубтарын жекешелендіру және коммерцияландыру жөніндегі тапсырмасы аясында жасалды. Құжат жеке инвестицияларды тартуды, басқарудың тұрақты нарықтық моделіне көшуді және корпоративтік менеджменттің заманауи стандарттарын енгізуді қарастырады. Негізгі бағыттардың қатарында материалдық-техникалық базаны жаңарту, жаттығу инфрақұрылымын дамыту, басқару процестерін цифрландыру және клубтың коммерциялық тиімділігін арттыру бар», – деп хабарлады «Ордабасы» 16 ақпанда.
Баспасөз хабарламасына әкім Сыздықбеков пен Integra Construction KZ иесі Шахмұрат Мүтәліп бейнеленген сурет қоса берілген.
МӘН-ЖАЙЫ
Естеріңізге сала кетейік, 2020 жылдың 1 қыркүйегінде президент Қасым-Жомарт Тоқаев Қазақстан халқына жолдауын жолдай отырып, кәсіби спорт командаларын толығымен мемлекеттік есебінен ұстаудың мағынасы жоқ екенін айтты. Оның пікірінше, бұқаралық спортқа, дене шынықтыруға және балаларға басымдық беруге болады, ал әр облыста, ірі аудан орталықтарында спорт секцияларын ашу керек. 2025 жылдың 8 қыркүйегінде жаңа жолдауында Тоқаев футболды коммерцияландыруды жалғастыру керек деп мәлімдеді.
