Жаңалықтар

Қазақстанда дрондар додасы өтті: мемлекеттік органдар командалары кім мықты екенін анықтады

2026 жылғы 17 қарашада Қазақстан Республикасы Мемлекеттік күзет қызметінің «Майлан» далалық оқу орталығында Military Drone Challenge турнирі өтті. Жарыс ұшқышсыз авиациялық жүйелерді қолдану және оларға қарсы іс-қимыл құралдарын тәжірибе жүзінде пайдалану дағдыларын жетілдіруге арналды, деп хабарлайды Tizgin.kz.

Турнирге Қазақстанның мемлекеттік органдарының командалары қатысты. Қатысушылар ұшқышсыз ұшу аппараттары мен оларға қарсы іс-қимыл жүйелерін пайдалана отырып, шынайы жағдайларға барынша жақындатылған ортада арнайы тапсырмаларды орындады.

Жарысты Қазақстан Республикасы Мемлекеттік күзет қызметі WSE ШЖС мен «Ashyq Aspan Foundation» қоғамдық қорының техникалық қолдауымен ұйымдастырды. Аталған қор Қазақстанда осы бағыттағы жарыстарды өткізетін уәкілетті ұйымдастырушы болып табылады.

Турнирдің негізгі мақсаты – ұшқышсыз авиациялық жүйелерді қолдану дағдыларын жетілдіру, мемлекеттік органдардың техникалық мүмкіндіктерін дамыту және қатысушылар арасында тәжірибе алмасу.

Жарыс қорытындысы бойынша:

  • Бірінші орын – Қазақстан Республикасы Мемлекеттік күзет қызметінің командасы;
  • Екінші орын – ҚР Қорғаныс министрлігі Радиоэлектроника және байланыс әскери-инженерлік институтының командасы;
  • Үшінші орын – ҚР ІІМ Ұлттық ұланының командасы.

Military Drone Challenge турнирін өткізу мемлекеттік органдар қызметкерлерін жауынгерлік және кәсіби даярлау жүйесіне заманауи ұшқышсыз технологиялар мен оларға қарсы іс-қимыл құралдарын енгізуге бағытталған.

Back to top button