Қазақ балуаны Лас Вегастағы әлем чемпионатында алтын алды
Бүгін АҚШ-тың Лас-Вегас қаласында күрес түрлерінен 23 жасқа дейінгі палуандар арасындағы әлем чемпионаты мәресіне жетті, деп хабарлайды Tizgin.kz.
Финалда кіммен күресті
Еркін күрестен соңғы жүлделер сарапқа салынып, отандасымыз Мерей Базарбаев 57 келіге дейінгі салмақтың финалында үздік шықты. Ол Бекир Кесермен (Түркия) күресіп, сенімді түрде жеңді. Есеп: 8-0.
Сөйтіп, Мерей Базарбаев күрестің осы түрінен командаға жалғыз медальді сыйлады.
Спортшының әлем чемпионатындағы жүріп өткен жолы:
- 1/8 айналым U23, U20 және U17 жас санатында әлем чемпионы Люк Лилледальді (АҚШ) ұтты. Есеп: 3-1.
- 1/4 финалда Расул Галбораевты (Франция) ұтты. Есеп: 13-2.
- Жартылай финалда Даито Катсумені (Жапония) жеңді. Есеп: 7-0.
АҚШ-та қанша медаль бұйырды
Жалпы Мерей Базарбаев осы жас санатында еркін күрестен әлем чемпионы атанған екінші палуанымыз. Қазақстанға тұңғыш алтынды 2024 жылы Албания астанасында Ризабек Айтмұхан (-97 келі) алып берген.
Биылғы АҚШ-тағы бәсекені Ұлттық құрама спортшылары барлығы 7 жүлдемен аяқтады. Нақты айтсақ, қоржында 3 алтын, 1 күміс және 3 қола медаль бар.
Айта кетейік, кеше Өскеменде грек-рим күресінен (87 келі) АҚШ-тағы додада күміс алған Темірлан Тұрдақынды жерлестері әуежайда күтіп алды.