Қарағанды қаласында болған келеңсіз жайт салдарынан екі жастағы бала комаға түскен, деп хабарлайды Tizgin.kz.
ДӘРІГЕРЛЕР НЕ ДЕЙДІ
Бала әлі де жансақтау бөлімінде жатыр. «31 арна» мәліметінше, ақ халаттылар оны медикаментозды комаға түсірген. Дәрігерлердің айтуынша, жағдайы тұрақты болғанымен, әлі оңала қоймады.
«Дәрігерлер әзірге нақты болжам жасай алмай отыр. Біз тек жақсылықтан үміттенеміз. Баламызға сенеміз. Тезірек қалыпты өмірге келсе екен дейміз», – деді баланың анасы Сабина Кәуапова.
Әмірдің ата-анасы үшін тәулік бойы көз ілмеген. Бала небәрі 2,5 жаста, үйдің жалғызы. Анасының айтуынша, қасбеттік кірпіш бас сүйегін тесіп өткен. Сәби бір литрге жуық қан жоғалтқан. Дәрігерлер ота кезінде сынықтарды алып, бас сүйегінің зақымданған бөлігін алып тастаған. Операция кезінде баланың жүрегі тоқтап қалған. Әкесінің сөзінше, плитка құлаған сәтте айналада бұған дейін де түскен басқа да сынықтар жатты, алайда оларға ешкім мән бермеген.
ПОЛИЦИЯ ІС ҚОЗҒАДЫ
Оқиғаға байланысты полиция қылмыстық іс қозғады. Ата-ана сөзінше, Бұқар жырау ауданы әкімдігі мен Мәдениет үйінің өкілдері келіп, баланың жағдайын сұраған. Анасы мен әкесі қаптаманың не себепті құлағанын анықтау үшін тиісті сараптамалар жүргізуді талап етуде. Отбасының адвокаттары кінәлі тараптан моральдық шығынды өтеп, емдеу шығындарын өндіріп алуға ниетті.
«Мұндай оқиғалар қауіпсіздік талаптарының өрескел бұзылуы мүмкін екенін көрсетеді. Сондықтан бұл іс ерекше бақылауда болуы тиіс. Басты міндет – зардап шеккен баланың құқықтарын қалпына келтіру ғана емес, болашақта осындай қайғылы жағдайлардың алдын алу», – деді адвокат Александр Кушнир.
