Шахтинскіде газ баллонын жарып жіберемін деп қорқытқан 33 жастағы тұрғын әкімшілік жауапкершілікке тартылды. Сотта ер адам бұл сөздерін «әзіл» деп түсіндіргенімен, сот оны 16 тәулікке қамауға алды, деп хабарлайды Tizgin.kz.
Оқиға қалай болды
Оқиға 2 қыркүйекте Шахтинск қаласында болған. Полицияға Карл Маркс көшесіндегі үйлердің бірінде орналасқан пәтерде тыныштық бұзылып жатқаны туралы хабарлама түскен.
Оқиға орнына жеткен полиция мән-жайды анықтауға кіріскен. Пәтерде болған 33 жастағы ер адам полиция қызметкерлерімен сөйлесу кезінде газ баллонын жарып жіберетінін айтып қорқытқан.
«Әзіл ретінде айттым»
Іс сотқа жеткенде ер адам ішімдік ішкенін мойындаған. Ал полиция қызметкерлеріне айтқан қорқыту сөздерін шын ниетпен емес, «әзіл» ретінде айтқанын түсіндірген.
Алайда бұл уәж оны жауапкершіліктен босатпады. Сот ер адамды қоғамдық тәртіпті бұзғаны үшін кінәлі деп танып, 16 тәулікке әкімшілік қамауға алу туралы шешім шығарды.
Орынсыз әзіл жауапкершіліктен босатпайды
Құқық қорғау органдары адамдардың өмірі мен қауіпсіздігіне қатер төндіретін мұндай мәлімдемелерді әзіл ретінде қабылдауға болмайтынын ескертеді.
