Түркістан облысындағы «Балауса» балалар сауықтыру лагерінде ұлы ақын Абай Құнанбайұлының өмірі мен шығармашылығын насихаттауға арналған ойын-сауық және танымдық бағдарлама ұйымдастырылды, деп хабарлайды Tizgin.kz.
Балаларға Абай әлемі таныстырылды
Іс-шара «Абай әлемі: Ойдан – өнегеге» әдеби-танымдық апталығы аясында Түркістан облыстық «Фараб» әмбебап ғылыми кітапханасының ұйымдастыруымен өтті.
Бағдарлама барысында балаларға Абай Құнанбайұлының өмірі мен шығармашылығына арналған арнайы кітап көрмесі таныстырылды. Қатысушылар ұлы ақынның әдеби мұрасы, қара сөздері мен рухани әлемі туралы мазмұнды мәлімет алды.
«Абайды білесің бе?» викторинасы өтті
Танымдық бөлімде балалар екі топқа бөлініп, өзара білім сайысында бақ сынады. «Абайды білесің бе?» атты викториналық ойында олар ақынның өмір жолы, шығармалары мен қара сөздеріне қатысты сұрақтарға жауап берді.
Сайыс барысында қатысушылар өз білімдері мен тапқырлықтарын көрсетіп, Абай мұрасын қаншалықты меңгергендерін танытты.
«Желсіз түнде жарық ай» әні шырқалды
Бағдарламаның әсерлі сәттерінің бірі – балалардың Абайдың әйгілі «Желсіз түнде жарық ай» әнін хормен орындауы болды. Жас қатысушылар өнерлерін ортаға салып, жиналған қауымға көтеріңкі көңіл күй сыйлады.
Іс-шара соңында белсенділік танытып, білім сайысында үздік нәтиже көрсеткен балаларға арнайы Алғыс хаттар мен естелік сыйлықтар табысталды.
Танымдық бағдарлама жас ұрпақтың Абай шығармашылығына деген қызығушылығын арттырып, ақын мұрасындағы тағылымды ойлар мен адамгершілік құндылықтарды кеңінен насихаттауға мүмкіндік берді.
