Өскемен – Зайсан бағытындағы әуе рейсіне билеттер 1 қыркүйектен бастап сатылымға шығады. Ұшақтар аптасына екі рет қатынайды, деп хабарлайды Tizgin.kz.
Рейстер аптасына екі рет орындалады
«Южное небо» компаниясы өкілдерінің мәліметінше, Өскемен мен Зайсан арасындағы әуе рейстері дүйсенбі және сенбі күндеріне жоспарланған.
Дүйсенбіде ұшақ Өскеменнен сағат 12:00-де ұшып, Зайсаннан кері бағытқа сағат 13:30-да шығады.
Сенбі күнгі Өскемен – Зайсан рейсі сағат 14:00-де орындалады. Ал Зайсаннан Өскеменге қайтатын ұшақ сағат 15:30-да көтеріледі.
Ұшу ұзақтығы – бір сағат
Екі қала арасындағы әуе сапары шамамен бір сағатқа созылады. Жаңа бағыт Шығыс Қазақстанның облыс орталығы мен шалғай ауданы арасындағы жол жүру уақытын едәуір қысқартуға мүмкіндік береді.
Әуе билеттерінің бағасы мен оларды сатып алу тәртібі туралы ақпарат әзірге жарияланған жоқ.
