Қазақстандық дзюдошы Фатима Сұпығалиева Эквадорда өтіп жатқан жасөспірімдер арасындағы дзюдодан әлем чемпионатында алтын медаль жеңіп алды. 16 жастағы спортшы Қазақстан тарихында қыздар арасында әлем чемпионы атанған алғашқы дзюдошы болды, деп хабарлайды Tizgin.kz Қазақстан дзюдо федерациясына сілтеме жасап.
Финал қосымша уақытта шешілді
Фатима Сұпығалиева 52 келіге дейінгі салмақ дәрежесінде ел намысын қорғады. Финалда ол украиналық Ксения Кирильчукпен кездесті.
Белдесудің негізгі уақытында жеңімпаз анықталған жоқ. Қосымша уақытта қазақстандық дзюдошы қарсыласынан басым түсіп, әлем чемпионатының алтын медалін иеленді.
Қазақстан дзюдо федерациясының мәліметінше, бұл – отандық әйелдер дзюдосы үшін тарихи нәтиже.
«Фатима Сұпығалиева – Қазақстан тарихында қыздар арасында әлем чемпионы атанған алғашқы дзюдошы», – делінген федерация хабарламасында.
Қазақстан қоржынында екі алтын
Жасөспірімдер арасындағы әлем чемпионаты Эквадордың Гуаякиль қаласында өтіп жатыр. Бұған дейін қазақстандық Ғабит Расулхан 60 келіге дейінгі салмақ дәрежесінде әлем чемпионы атанған еді.
Осылайша, Қазақстан құрамасының қоржынындағы алтын медаль саны екіге жетті.
