“Қайрат” пен “Ордабасы” футбол командаларының матчы қарсаңында Алматы қаласы полиция департаменті жанкүйерлер үндеу жасады. Тәртіп сақшылары қоғамдық тәртіпті сақтауға шақырды, деп хабарлайды Polisia.kz.
Көптен күткен матч
Алдағы матчта Алматыдағы Орталық стадионға мыңдаған көрермен жиналады. Қатысушылар мен жанкүйерлердің қауіпсіздігін қамтамасыз ету үшін күшейтілген полиция жасақтары, Ұлттық ұланның әскери қызметшілері және басқа да бейінді қызметтер жұмылдырылады. Стадион аумағында және оған іргелес учаскелерде заманға сай бейнебақылау және бақылау құралдары да бәрін бақылап тұр.
“Қоғамдық тәртіптің бұзылуының алдын алуға ерекше назар аударылады. Полиция қызметкерлері көрерменді арандатуға ермей, заң талаптарын сақтауға, айналасындағыларға құрметпен қарауға және өз командаларын тек спорт мәдениеті аясында қолдауға шақырады”, – делінген хабарламада.
Полицияның ескертуі
Полиция агрессивті мінез-құлық, тыйым салынған атрибутиканы пайдалану, былапыт сөз айту мен жанжал туғызуға әрекет жасау сияқты кез келген құқыққа қайшы әрекетке заңға сәйкес құқықтық баға берілетінін еске салады.
“Қолдау көрсету үшін Алматыға келген барлық жанкүйерді қуана қарсы аламыз. Біздің ортақ міндетіміз – бұл матчтың әдемі ойынмен, жарқын эмоциялармен және бір-біріне деген құрметпен есте қалуын қамтамасыз ету. Баршаңызды қоғамдық тәртіпті сақтауға, арандатуға ермеуге және нағыз жанкүйерді мінез-құлық мәдениеті, қарсыласқа деген құрметі мен өз командасына шынайы қолдау көрсетуі ерекшелендіретінін есте ұстауға шақырамыз. Өз тарапымыздан полиция матчқа қатысушылар мен көрермендердің қауіпсіздігін қамтамасыз ету үшін барлық қажетті шараларды қабылдайды, – деп атап өтті Алматы қаласы полиция департаменті қоғамдық қауіпсіздік басқармасының бастығы Тимур Ноғайбаев.
Командалар бүгін сағат 19.00-де Алматыдағы Орталық стадионда кездеседі. Ойынға арналған билеттердің бәрі сатылып кеткен.
