Қазақстанда тұрмыстық зорлық-зомбылықтың алдын алуға бағытталған «Біз қасыңыздамыз. Бізден сұраңыз» республикалық акциясының қорытындысы жарияланды. Екі күн ішінде полицияға 423 өтініш түсіп, оның 70-і шұғыл әрекет етуді қажет еткен. Ішкі істер министрлігі қазақстандықтарды зорлық-зомбылық белгілеріне бейжай қарамауға шақырды, деп хабарлайды Tizgin.kz.
Екі күнде полиция 1133 рет мекенжайларға барған
Ішкі істер министрлігі 12 қарашада 5–6 қараша күндері өткен «Біз қасыңыздамыз. Бізден сұраңыз» акциясының нәтижесін жариялады. Акция барысында полиция қызметкерлері Threads әлеуметтік желісі және басқа да байланыс арналары арқылы тұрғындардың сұрақтарына тікелей жауап беріп, көмекке мұқтаж азаматтардың өтініштерін қабылдаған. Бастамаға құқық қорғау органдарымен қатар, құқықтық, психологиялық және әлеуметтік көмек көрсететін мемлекеттік мекемелер мен ұйымдардың өкілдері қатысқан.
ІІМ ұсынған мәліметке сәйкес, екі күн ішінде:
- Полицияға 423 өтініш түскен;
- 70 өтініш бойынша шұғыл әрекет ету қажет болған;
- Азаматтарға 627 түрлі көмек көрсетілген;
- Полиция қызметкерлерінің мекенжайларға 1133 рет баруы ұйымдастырылған.
Ведомствоның хабарлауынша, тұрғындар әртүрлі өмірлік жағдайларға байланысты көмек сұраған. Әр өтініш қаралып, қажетті түсініктемелер берілген. Ал жедел әрекет етуді қажет еткен жағдайларда тиісті қызметтер тартылып, нақты шаралар қабылданған. Министрлік әлеуметтік желілер азаматтарға кеңес беретін алаң ғана емес, көмекке мұқтаж адамдарды анықтап, оларға жедел қолдау көрсетудің тиімді құралына айналып келе жатқанын атап өтті.
«Көршіңізден айқай естісеңіз – үнсіз қалмаңыз»
ІІМ Әкімшілік полиция комитетінің басқарма басшысы Ақмарал Серікбаева отбасындағы зорлық-зомбылықтың алдын алу тек полицияның міндеті емес екенін айтты. Оның сөзінше, айналасында болып жатқан жағдайларға бейжай қарамайтын азаматтардың көмегі көптеген құқықбұзушылықтың алдын алуға мүмкіндік береді.
«Қабырғаның ар жағынан айқай естісеңіз, көрші отбасыдағы қиындықтарды білсеңіз немесе біреудің көмекке мұқтаж екенін байқасаңыз, бейжай қалмаңыз. Мұндай жағдайлар туралы хабарлаудан қорықпаңыз», – деді ол.
Министрлік өкілі қандай да бір жағдайдың құқықбұзушылық екеніне сенімді болмаса да, полицияға хабарласуға болатынын түсіндірді. Мамандар келіп түскен ақпаратты тексеріп, қажет болған жағдайда қандай әрекет жасау керегін анықтауға көмектеседі. Ақмарал Серікбаеваның айтуынша, өткен акция азаматтардың полициямен ашық байланыс орнатуға мүдделі екенін көрсетті.
«Біздің міндетіміз – адамды тыңдап, оған көмектесу»
Ішкі істер министрлігі тұрмыстық зорлық-зомбылыққа тап болған адамдарды ғана емес, мұндай жағдайға куә болған азаматтарды да құқық қорғау органдарына жүгінуге шақырады. Ведомствоның мәліметінше, әлеуметтік желілер арқылы түскен өтініштер құқықтық кеңес берумен шектелмей, нақты көмек көрсетуге және тиісті мемлекеттік қызметтерді жұмылдыруға мүмкіндік берген.
«Біздің міндетіміз – хабарламаны қабылдап қана қою емес, адамды тыңдап, оған көмектесу. Біз қасыңыздамыз. Бізден сұраңыз», – деп атап өтті Ақмарал Серікбаева.
Еске салайық, «Біз қасыңыздамыз. Бізден сұраңыз» акциясы тұрмыстық зорлық-зомбылықтан зардап шеккен, көмек сұрауға қорқатын немесе мұндай жағдайларға куә болған азаматтарды қолдауға бағытталған. Акция аясында тұрғындар ІІМ Әкімшілік полиция комитетінің Threads желісіндегі ресми парақшасы арқылы мамандарға сұрақ қойып, құқықтық кеңес ала алды.
Министрлік отбасындағы зорлық-зомбылық жағдайларын жасырмай, дер кезінде хабарлаудың маңызын еске салды. Қауіп төнген жағдайда азаматтар полицияның 102 нөміріне немесе 112 бірыңғай шұғыл қызметіне хабарласа алады.
