Астана қаласының полиция департаменті журналист Лұқпан Ахмедияровқа қылмыстық кодекстің 274-бабымен (көпе-көрнеу жалған ақпарат тарату) іс қозғалғанын растады, деп хабарлайды Tizgin.kz.
Ақпаратты Астана қаласының полиция департаменті растаған. Бұған дейін “Просто журналистика” жобасының авторын Қазақстаннның шекара қызметі елден шығармай қойған.
Не белгілі
Бұған дейін Өскемен қаласының тұрғыны Андрей Котов Қазақстанның Бас прокуроры Берік Асыловқа бейнеүндеу жолдады. Ол өзінің аты-жөні Ресей мен Украина арасындағы соғысқа қатысты делінген қазақстандықтардың тізіміне енген жарияланымға байланысты жағдайға назар аударуды сұрайды. Котовтың айтуынша, ол ешқашан соғысқа қатыспаған. Осыған байланысты ол журналист Лұқпан Ахмедияровтың әрекетіне құқықтық баға беруді сұраған.
Журналистің өзі не дейді
Лұқпан Ахмедияров Украинаның мемлекеттік жобасы жариялаған тізімді бөлісіп, билік назарын аударуды көздегенін айтады. “Біз нақты білеміз, тізімдегі Қазақстанның 661 азаматының бәрі соғысқа қатысқан” деп, ешбіріміз жазған жоқпыз. Менің мотивациям Қазақстан үкіметінің соған назарын аудару болды” деген ол Азаттыққа.
“Хочу жить” жобасы жайлы
«Хочу жить» (Өмір сүргім келеді) – Украина қорғаныс министрлігінің бас барлау басқармасы үйлестіретін мемлекеттік жоба. Ол 2022 жылы Ресейдің Украинаға қарсы толық ауқымды соғысы басталғаннан кейін іске қосылған. Жобаның негізгі мақсаты – соғысқа қатысқысы келмейтін немесе тұтқынға өз еркімен берілгісі келетін ресейлік әскери қызметшілерге қауіпсіз байланыс арнасын ұсыну. «Хочу жить» сонымен қатар, уақыт өте келе Ресей армиясындағы шетел азаматтарына, соның ішінде келісімшартпен қызмет етіп жүрген азаматтарға қатысты ақпараттарды да жариялап отырады. Бұған дейін “Ресей жағында соғысып жүр” деп, жоба 660 азаматтың тізімін жариялаған еді.
