Wildberries пен Ozon-нан жасалған сатып алуға жаңа кеден ережелері әсер ете ме: МКК түсіндірді

Қазақстанда электронды саудаға қатысты енгізілетін жаңа кедендік реттеу ережелері тек үшінші елдерден Қазақстанға жеткізілетін тауарларға қатысты болады. Ал Ресей мен Беларусьтен келетін тауарларға бұл өзгерістер қолданылмайды, деп хабарлады Мемлекеттік кірістер комитетіне қарасты Кедендік әдіснама басқармасының басшысы Болат Ибрагимов, деп жазады Tizgin.kz.

Жаңа ережелер қашан енгізіледі

Оның айтуынша, Қазақстанда электронды саудаға арналған жаңа тетіктер 2023 жылдан бері пилоттық жоба аясында сынақтан өтіп келеді.

Кеден заңнамасына өзгерістер енгізілгеннен кейін электронды сауда операторлары мемлекеттік кірістер органдарында қайта тіркеуден өтуі қажет. Бұл ретте нарық қатысушыларына алты айлық өтпелі кезең беріледі.

Өтпелі кезеңде қандай тәртіп болады

Өтпелі кезең барысында электронды сауда тауарларын:

• электронды сауда операторлары;
• басқа да кеден өкілдері

жеке тұлғалардың өтініші бойынша декларациялай алады.

Ал өтпелі кезең аяқталғаннан кейін электронды сауда тауарларын декларациялау құқығы тек тіркелген электронды сауда операторларында болады.

Маркетплейстер кеден қоймаларын аша алады

Сонымен қатар, электронды сауда операторларына кеден қоймаларын ашуға мүмкіндік беріледі.

Болат Ибрагимовтың айтуынша, бұл маркетплейстерге тауарларды Қазақстан аумағындағы қоймаларда орналастырып, сатып алушыларға тапсырыстарды жылдамырақ жеткізуге мүмкіндік береді.

«Егер мұндай қойма Қазақстан аумағында орналасса, жеке тұлға электронды сауда тауарын бір-екі күн ішінде алып кете алады», – деп түсіндірді МКК өкілі.

Wildberries пен Ozon-ға қатысты ма

Болат Ибрагимов жаңа нормалар Ресей мен Беларусьтен жеткізілетін тауарларға қолданылмайтынын тағы да нақтылады.

Электронды сауданы кедендік реттеу үшінші елдерден келетін тауарларға қатысты болады. Мысалы:

• Қытай;
• Еуропа елдері;
• АҚШ.

«Бұл заңнамадағы жаңалық Wildberries немесе Ozon арқылы алынатын тауарларға қатысты ма деген сұрақ көп қойылады, алайда бұл кедендік реттеу тек үшінші елдерден жеткізілетін тауарларға қатысты», – деді Ибрагимов.