«Қазатомөнеркәсіп» 2026 жылдың алғашқы жартыжылдығына арналған қаржылық есебін жариялады. Компанияның түсімі 9%-ға өсіп, 717,8 млрд теңгеге жеткенімен, таза пайдасы 9%-ға төмендеп, 240,4 млрд теңгені құрады, деп хабарлайды Tizgin.kz.
Уран қымбаттады, өндіріс артты
Биылғы алты айда компанияның түзетілген EBITDA көрсеткіші 2%-ға өсіп, 371,3 млрд теңгеге жетті. Ал «Қазатомөнеркәсіптің» үлесіне тиесілі EBITDA 12%-ға азайып, 264,8 млрд теңге болды. Бір акцияға шаққандағы пайда да 22%-ға төмендеп, 604 теңгені құрады.
Компанияның қаржылық нәтижесін қолдап тұрған негізгі фактордың бірі – әлемдік нарықтағы уран бағасы. Топтың уранды сатудағы орташа бағасы 16%-ға көтеріліп, бір фунт үшін 67,88 долларға жеткен. Осы кезеңде уранның орташа спот бағасы 24–25%-ға өсіп, бір фунт үшін шамамен 86 доллар болды.
Өндіріс көлемі де ұлғайған. Топ кәсіпорындары алғашқы жартыжылдықта 13 291 тонна уран өндірді. Бұл былтырғы сәйкес кезеңнен 9%-ға көп. «Қазатомөнеркәсіптің» үлесіне тиесілі өндіріс 10%-ға артып, 7 054 тоннаға жетті.
Соған қарамастан, топтың жалпы сату көлемі айтарлықтай өзгермеген. Ал компанияның өз сату көлемі 13%-ға қысқарды. Дайын уран қоры керісінше 23%-ға көбейіп, 8 245 тоннаға жеткен.
Өзіндік құн өсіп, болжам төмендеді
Компания үшін басты мәселе – өндіріс шығынының күрт өсуі. Уран өндірудің ақшалай өзіндік құны 37%-ға қымбаттап, бір фунт үшін 24,48 долларға жетті. Толық қолдаушы өзіндік құн 25%-ға өсіп, 38,45 доллар болды.
«Қазатомөнеркәсіп» мұны пайдалы қазбаларды өндіру салығы мөлшерлемесінің 9%-дан 12,4%-ға көтерілуімен, күкірт қышқылының қымбаттауымен және теңгенің нығаюымен түсіндірді.
Шығынның өсуі компанияны 2026 жылға арналған қаржылық болжамын қайта қарауға мәжбүр етті. Жалпы түсім болжамы 2,2–2,3 трлн теңгеден 2,1–2,2 трлн теңгеге дейін төмендетілді. Уран сатудан түсетін кіріс болжамы да 2,075–2,175 трлн теңгеден 1,9–2 трлн теңгеге дейін қысқарды.
Бұған қоса, уран өндірудің болжамды ақшалай өзіндік құны бір фунт үшін 23,5–25 доллардан 25,5–27 долларға дейін көтерілді. Толық қолдаушы өзіндік құн болжамы 35–36,5 доллардан 39–40,5 долларға дейін ұлғайтылды.
Компания күрделі шығындар жоспарын да 415–430 млрд теңгеден 435–450 млрд теңгеге дейін арттырды. Ал өндіріс пен сату көлеміне қатысты болжам өзгеріссіз қалды.
Жаңартылған есеп бір доллардың бағамы 490 теңге болады деген болжамға негізделген. Бұған дейін компания есептеулерінде доллар бағамын 540 теңге деп алған еді. Осылайша теңгенің нығаюы мен өндірістік материалдардың қымбаттауы «Қазатомөнеркәсіптің» қаржылық жоспарын төмендетуіне негізгі себептердің біріне айналды.
