Қазақстан президенті Қасым-Жомарт Тоқаев Түркия Республикасының құрылғанына 103 жыл толуына арналған мерекелік іс-шараларға қатысу үшін Анкараға барады, деп хабарлайды Tizgin.kz.
Түркия астанасында 30 қазанда Түркі мемлекеттері ұйымының 13-саммиті де өтеді.
Ердоған мерейтой туралы не дейді
Түркия президенті Режеп Тайип Ердоған әлеуметтік желідегі жазбасында Республика күнін түркі әлемінен келетін мәртебелі қонақтармен бірге атап өтетінін мәлімдеді.
«Біз бұл мерейтойды түркі әлемінен келген мәртебелі қонақтармен бірге зор ықыласпен атап өтеміз», – деп жазды Ердоған.
Биыл Түркия Республикасының құрылғанына 103 жыл толады. Осыған орай Анкарада өтетін мерекелік іс-шараларға түркі елдерінің өкілдері қатыспақ.
Анкарада түркі мемлекеттерінің басшылары бас қосады
30 қазанда Анкарада Түркі мемлекеттері ұйымының 13-саммиті өтеді. Бұл жиын Республика күніне арналған мерекелік іс-шаралармен тұспа-тұс келіп отыр.
Ердоған түркі елдері бауырластықты сақтау жолында тағы да бірлік танытатынына сенім білдірді. Саммиттің нақты күн тәртібі мен қабылдануы жоспарланған құжаттар туралы берілген хабарламада айтылмаған.
