Ресейдің 27 өңірінде адамның иммун тапшылығы вирусы (АИТВ – ВИЧ) эпидемиясының жалпы сипат алған сатысы байқалып отыр. Бұл – инфекцияның таралуы жекелеген қауіп топтарымен шектелмей, жалпы халық арасында орныққанын білдіретін эпидемиологиялық көрсеткіш, деп хабарлайды Tizgin.kz DW басылымына сілтеме жасап.
Роспотребнадзордың Орталық эпидемиология ғылыми-зерттеу институтының директоры, академик Василий Акимкиннің айтуынша, аталған өңірлерде жүкті әйелдердің 1 пайыздан астамынан АИТВ анықталған. Бұл мәлімет «АИТВ инфекциясын эпидемиологиялық қадағалау» конференциясында айтылған.
Жаңа жағдайлар азайғанымен, індеттің салмағы жеңілдемеген
DW келтірген дерек бойынша, ең күрделі ахуал Кемерово, Иркутск және Свердлов облыстарында қалыптасқан. 2025 жылы Ресейде АИТВ жұқтырудың 45 мың жаңа жағдайы тіркелген. Бұл 2024 жылғы көрсеткіштен 13,4 пайызға төмен. Алайда мамандар жаңа жағдайлардың азаюы эпидемия толық бақылауға алынды дегенді білдірмейтінін атап өтті.
«Ауруға шалдығу көрсеткішінің төмендегенін байқап отырмыз, бұл төмендеу тұрақты. Бірақ АИТВ инфекциясының ауыртпалығы азайған жоқ», – деді институттың ЖИТС-тің алдын алу және оған қарсы күрес бөлімінің жетекші ғылыми қызметкері Наталья Ладная.
«Медвестник» басылымының хабарлауынша, Ресейде АИТВ-мен өмір сүретін адамдар арасында жыл сайын 30–34 мың өлім тіркеледі. Ладная бұл көрсеткішті өте жоғары деп бағалаған. Оның айтуынша, әрбір қайтыс болған адамға шаққанда инфекция жұқтырудың шамамен 1,5 жаңа жағдайы анықталады. Сондықтан АИТВ-мен өмір сүретін адамдардың жалпы саны ұлғайып келеді.
Сонымен қатар «Независимая газета» Ресейдің 2027 жылға арналған бюджет жобасында дәрі-дәрмекке қосымша қаржы жаңадан анықталатын 30 мың адамға ғана есептелгенін жазған. Бұл 2025 жылы тіркелген жаңа жағдайлар санынан аз.
Мәселе алаңдатып отыр
Наталья Ладнаяның мәліметінше, 2025 жылдың соңына қарай Ресейде АИТВ-мен өмір сүретін адамдардың тек жартысында вирустық жүктеме басылған. Яғни ем арқылы ағзадағы вирус мөлшері қажетті деңгейге дейін төмендетілген. Ал терапия қабылдап жүргендердің арасында бұл көрсеткіш 77,9 пайыз болған. DW келтірген мәліметке сәйкес, эпидемияны бақылауға бағытталған халықаралық мақсатты көрсеткіш – кемінде 95 пайыз.
Медициналық көмек көрсету кезіндегі қауіпсіздік те жеке мәселе болып отыр. Роспотребнадзордың халықтың эпидемиологиялық саламаттылығы басқармасының басшысы Елена Игонина 2025 жылы Ресейдің медициналық ұйымдарында АИТВ мен гепатит жұқтырудың сегіз ошағы анықталғанын хабарлаған. Бұл – соңғы 15 жылдағы ең жоғары ошақ саны. Игонина жұқтырудың негізгі себебі ретінде санитариялық-эпидемиологиялық талаптардың бұзылуын атаған. Соның ішінде бір пациентке арналған катетерлерді немесе қандағы қантты өлшейтін глюкометрлерді бірнеше адамға қолдану фактілері болған.
