Таразда өтіп жатқан бокстан Қазақстан чемпионатында күтпеген нәтиже болды. 19 жастағы Әділбек Қожахан IBA нұсқасы бойынша әлем чемпионы, Азия біріншілігінің жеңімпазы Оразбек Асылқұловты жеңіп, финалға жолдама алды, деп хабарлайды Tizgin.kz.
60 келіге дейінгі салмақ дәрежесінде өткен жартылай финалдық жекпе-жекте жас боксшы тәжірибелі қарсыласынан басым түсті.
Алғашқы раундта бес төрешінің үшеуі Қожаханға басымдық берді. Екінші раундта ол қарқынын үдетіп, барлық бес төрешінің қолдауына ие болды. Шешуші үшінші раундта да Әділбек қарсыласынан басым түсті.Нәтижесінде 19 жастағы боксшы төрешілердің бірауыздан қабылдаған шешімімен 5:0 есебімен жеңіске жетті.
Айта кетейік, 29 жастағы Оразбек Асылқұлов 2025 жылы IBA ұйымдастырған әлем чемпионатында алтын медаль жеңіп алса, 2026 жылы Азия чемпионы атанған.
Ал Әділбек Қожахан бұған дейін мұндай деңгейдегі ірі халықаралық жетістіктерімен көзге түспеген. Соған қарамастан, жас боксшы ел чемпионатында атақты қарсыласын жеңіп, жарыстың басты сенсацияларының бірін жасады.
