Солтүстік Қазақстан облысында прокуратураның араласуынан кейін бес жұмысшы екі жылға жуық уақыт бойы төленбей келген жалақысын алды. Кәсіпорын қызметкерлеріне жалпы сомасы 2 млн теңгеден астам берешек толық өтелді, деп хабарлайды Tizgin.kz өңірлік прокуратураға сілтеме жасап.
Жұмысшылар екі жылға жуық жалақысын ала алмаған
Облыстық прокуратураның мәліметінше, «Құқықтық дәріхана» акциясы кезінде жауапкершілігі шектеулі серіктестіктердің бірінде жұмыс істейтін бес қызметкер жалақыларының ұзақ уақыт төленбей келгеніне шағымданған.
Тексеру және қабылданған шаралар нәтижесінде жұмысшылардың еңбек құқықтары қалпына келтіріліп, кәсіпорынның 2 млн теңгеден астам берешегі толық өтелген. Белгілі болғандай, жалақы бойынша қарыз екі жылға жуық уақыт бойы жиналған. Прокуратураның араласуымен тағы 30-дан астам азаматтың банк шоттарына қойылған және Қазақстаннан шетелге шығуына қатысты негізсіз шектеулер алынып тасталған.
Жалпы, акция басталғалы прокуратура қызметкерлеріне 4 мыңға жуық тұрғын жүгінген. Олардың мыңнан астам мәселесі сол жерде шешімін тапқан. Тұрғындар көбіне әлеуметтік қамсыздандыру, жер қатынастары, тұрғын үй-коммуналдық шаруашылық және еңбек құқықтарын қорғау мәселелері бойынша көмек сұрайды. Сондай-ақ интернет-алаяқтық пен дропперлікке қатысты шағымдар да жиі түседі.
Тұрғындар заңгерлік көмекті қайдан ала алады?
Солтүстік Қазақстан облысының прокуратурасы «Құқықтық дәріхана» акциясы тұрғындарға кеңес берумен ғана шектелмейтінін атап өтті. Оның басты мақсаты – азаматтардың мәселесін іс жүзінде шешуге көмектесу және бұзылған құқықтарын қалпына келтіру. Акция әр сейсенбі сайын сағат 16:00-ден 18:00-ге дейін Петропавл қаласындағы «Рахмет» сауда үйінде, сондай-ақ облыс аудандарында өткізіледі.
Заңгерлік көмек алу үшін алдын ала жазылудың немесе мемлекеттік мекемелерге арнайы барудың қажеті жоқ. Тұрғындар белгіленген уақытта акция өтетін орынға келіп, өз мәселесін тікелей прокуратура өкілдеріне жеткізе алады. Қадағалау органы азаматтардың тұрғылықты жеріне, әлеуметтік жағдайына және көтерген мәселесінің сипатына қарамастан, құқықтық көмек көрсетілетінін мәлімдеді.
Прокурорлар әсіресе шұғыл әрекет етуді және нақты шаралар қабылдауды қажет ететін өтініштерге басымдық береді.
