Қытайдың Хайнань аралынан Астанаға ұшуға тиіс Air Astana рейсі техникалық ақауға байланысты 27 сағатқа кешікті. Бұл туралы жолаушылырдың бірі Threads әлеуметтік желісінде мәлімдеді, деп хабарлайды Tizgin.kz.
Оның айтуынша, Хайнаньда 150-ден астам адам ұшақты бір тәуліктен астам уақыт күткен. Олардың арасында егде жастағы 30 әйел адам мен мен 20 бала бар.
Air Astana әуе компаниясы Санья-Астана бағытындағы KC584 рейсі кешіккенін растады. Ұшақ 4 қарашада ұшуға тиіс болған.
«Гидравликалық жүйедегі қысымның төмендеуіне байланысты рейс келесі күнге шегерілді», – деп мәлімдеді компанияның баспасөз қызметі.
Компания мәліметінше, ақауы бар бөлшек ауыстырылып, жолаушыларға қонақүй, тамақ және трансфер ұйымдастырылған.
Ұшақ 5 қарашада жергілікті уақыт бойынша сағат 10:07-де Саньядан ұшып шықты.
