Ол әрдайым қаһарман болды, бірақ оны Португалияда бағаламайды – Роналдудың анасы
Әйгілі футболшы Криштиану Роналдудың анасы Долорес Авейру ұлының Португалия футболына сіңірген еңбегі лайықты бағаланбайтынын айтты. Ол ұлттық құрамадағы жанжалдың арты не болатынына алаңдайтынын мәлім етті, деп хабарлайды Tizgin.kz.
«Оның еңбегі елеусіз қалмайды»
Долорес Авейру жергілікті TV7 Dias журналына берген сұхбатында ұлының басынан өткен жағдай өзіне ауыр тигенін жеткізді.
«Көңілім түсті, бұл – қалыпты жағдай. Ұлым басын тік ұстап, алдыңғы есіктен кете алар еді, бірақ артқы есіктен шықты. Дегенмен ештеңе етпейді, Құдай бәрін реттейді. Аздап жылап алдым. Іштегі сезімді сыртқа шығару да пайдалы. Біз мұның бәрін еңсеруіміз керек», – деді ол.
Авейру Роналдудың Португалия үшін көп еңбек сіңіргенін атап өтті. Оның пікірінше, кейінгі оқиғалар футболшының жетістіктерін жоққа шығара алмайды.
«Ол Португалия үшін көп еңбек сіңірді. Сондықтан оның еңбегі елеусіз қалмайды. Ол әрдайым Португалияның қаһарманы болды. Бірақ оны лайықты деңгейде бағаламайды», – деді футболшының анасы.
Ұлттық құрамадағы жанжал неден басталды
Роналду Ұлттар лигасындағы матчта алаңға шықпағаннан кейін Португалия құрамасының жаттығуына қатыспаған. Кейін футболшы ұлттық құраманың орналасқан жерінен кететінін мәлімдеген.
Басылымның жазуынша, Португалия футбол федерациясы оның өз бетінше кетуіне байланысты ойыннан шеттетілуі және айыппұл төлеуі мүмкін екенін хабарлаған. Сондай-ақ Роналдудың құрамадағы жетінші нөмірі басқа ойыншыға берілгені айтылған. Кейін ұлттық құраманың бас бапкері Жорже Жезуш Роналдудың командаға қалаған уақытында орала алатынын жеткізген. Ал футболшы бапкермен арадағы келіспеушілік туралы айта отырып, Жезуштің өзіне берген уәдесін екі рет бұзғанын мәлім етті.