Жаңа оқу жылы қарсаңында Денсаулық сақтау министрлігі ата-аналарға мектеп сөмкесін таңдаудың негізгі талаптарын түсіндірді. Мамандардың айтуынша, оқулықтар мен оқу құралдары салынған сөмкенің жалпы салмағы баланың дене салмағының 10%-ынан аспауы керек, деп хабарлайды Tizgin.kz.
Сөмке таңдағанда оның сыртқы дизайны мен сыйымдылығына ғана мән беру жеткіліксіз. Мектеп сөмкесі жеңіл, баланың бойына сай әрі арқасына ыңғайлы орналасуы қажет. Дұрыс таңдалмаған немесе шамадан тыс ауыр рюкзак баланың иығы мен арқасына артық салмақ түсіреді.
Сөмкенің салмағы қанша болуы керек
Денсаулық сақтау министрінің № ҚР ДСМ-76 бұйрығында оқушының жасына қарай оқу құралдарының ұсынылатын салмағы белгіленген.
Атап айтқанда:
- 1–3-сынып оқушылары үшін – 2 килограмға дейін;
- 4–5-сынып оқушылары үшін – 2,5 килограмға дейін;
- 6–7-сынып оқушылары үшін – 3,5 килограмға дейін;
- 8–11-сынып оқушылары үшін – 4,5 килограмға дейін.
Бұл көрсеткіштер рюкзактың өзін есептемегендегі күнделікті оқу құралдарының салмағына қатысты.
Сонымен қатар мамандар оқулықтар, дәптерлер және басқа да қажетті заттар салынған рюкзактың жалпы салмағы баланың дене салмағының 10%-ынан аспауға тиіс екенін ескертеді. Мәселен, оқушының салмағы 30 килограмм болса, толық жиналған сөмке 3 килограмнан ауыр болмағаны жөн.
Рюкзактың өзінің салмағын да ескеру қажет. Бос рюкзак неғұрлым жеңіл болса, баланың арқасы мен иығына түсетін қосымша жүктеме соғұрлым азаяды. Мамандар бос сөмкенің салмағы 1 килограмнан аспауын ұсынады.
Мектеп сөмкесін таңдағанда нені ескеру қажет
Мамандар рюкзакты баламен бірге таңдауға кеңес береді. Сатып алар алдында оны баланың арқасына салып көріп, бойына сәйкес келетініне және денесіне ыңғайлы орналасатынына көз жеткізген дұрыс. Рюкзак тым үлкен болмауы және белден айтарлықтай төмен түсіп тұрмауы керек.
Сапалы мектеп рюкзагында:
- жүктемені біркелкі бөлетін кең әрі жұмсақ иықбаулар;
- арқаның дұрыс орналасуын қамтамасыз ететін тығыз арқалық бөлік;
- ұзындығы реттелетін иықбаулар;
- қараңғы уақытта баланың жүргізушілерге анық көрінуіне көмектесетін жарық шағылыстырғыш элементтер;
- берік әрі су өткізбейтін материал болғаны жөн.
Тіпті ең ыңғайлы рюкзактың өзі қажетсіз заттарға толса, бала үшін ауыр жүкке айналады. Сондықтан ата-аналар сөмкенің ішін мезгіл-мезгіл тексеріп, сабаққа қажет емес ойыншықтарды, артық дәптерлер мен кітаптарды үйде қалдырғаны дұрыс.
Баланы сөмкенің бір иығына емес, екі иығына қатар асып жүруге дағдыландыру да маңызды. Бұл салмақтың арқа мен иыққа біркелкі бөлінуіне мүмкіндік береді. Ал мектепте жағдай қарастырылған болса, оқулықтар мен оқу құралдарының бір бөлігін сыныпта қалдыруға болады.
Мектепке шығар алдында сөмкені тексеруге бірнеше минут жеткілікті: артық заттарды алып тастап, иықбауларын реттеп, сөмкенің салмағын бағалау қажет. Баланың бойына сай таңдалған жеңіл рюкзак пен дұрыс қалыптасқан күнделікті әдеттер оның оқу күнін жайлы өткізуіне және арқасына түсетін артық жүктемені азайтуға көмектеседі.
