Еуропалық одақ қақтығыс, табиғи апат және өзге де дағдарыстардан зардап шеккендерге қосымша 710 млн еуро гуманитарлық көмек бөледі. Бұл туралы Еуропалық комиссия төрағасы Урсула фон дер Ляйен 26 қыркүйекте Нью-Йоркте өткен Global Citizen Festival қатысушыларына жолдаған бейнеүндеуінде мәлімдеді. Ауа райының қолайсыздығына байланысты фестиваль кейін тоқтатылған, деп хабарлайды Tizgin.kz.
Көмек бөлгенде Африкаға, сондай-ақ үйлерін тастап кетуге мәжбүр болған адамдар мен оларды қабылдаған қауымдастықтарға басымдық беріледі. Қаражаттың шамамен 380 млн еуросы Сахараның оңтүстігіндегі Африка елдеріндегі көші-қонға қатысты шараларға бағытталады. Оның ішінде мигранттардың осал топтарын қолдау, туған еліне оралуына және қоғамға қайта бейімделуіне жәрдемдесу бар.
Қаражат Украинаға, Палестина мен Ливанға да бөлінеді
Жедел гуманитарлық көмекке 252 млн еуро қарастырылған. Бұл қаражат қарулы қақтығыстар, халықтың мәжбүрлі қоныс аударуы, індеттер мен табиғи апаттардың салдарын жоюға жұмсалады. Оның 97 млн еуросы Сахараның оңтүстігіндегі Африка елдеріне, 103 млн еуросы Палестина аумақтары мен Ливанға, ал 52 млн еуросы Украинаға бөлінеді. Украинаға арналған көмектің бір бөлігі қысқа дайындыққа бағытталады.
Бұдан бөлек, Африкадағы Ұлы көлдер аймағына және Конго Демократиялық Республикасының шығысындағы Эбола індетіне қарсы күреске де қаражат қарастырылған.
Еурокомиссия мәліметінше, 2026 жылы ЕО әлем бойынша гуманитарлық көмекке бюджеттен шамамен 1,9 млрд еуро бөлген. Оның ішінде Сахараның оңтүстігіндегі Африка елдеріне 557 млн еуро, Таяу Шығыс пен Солтүстік Африкаға 463 млн еуро қарастырылған.
Украинаға биыл бастапқыда 145 млн еуро бөлу жоспарланған. Кейінгі айларда Украина мен Молдоваға арналған гуманитарлық көмектің жалпы көлемі 248 млн еуроға дейін ұлғайтылды. Қаражат азық-түлік пен медициналық көмекке, тұрғын үйлерді қалпына келтіруге, ақшалай төлемдерге және қысқа дайындыққа жұмсалады.
Еурокомиссия Ресей бастаған толық ауқымды соғыс басталғалы бері Украинадағы гуманитарлық бағдарламаларға 1,4 млрд еуродан астам қаражат бөлгенін хабарлады.
