Әлемнің бірінші ракеткасы, қазақстандық теннисші Елена Рыбакина Қытайдың Ухань қаласында өтетін WTA 1000 турниріне қатыспайды. Спортшы табанынан алған жарақатына байланысты жарыстан бас тартты, деп хабарлайды Tizgin.kz турнир ұйымдастырушыларына сілтеме жасап.
Рыбакина жанкүйерлерінен кешірім сұрады
Уханьдағы турнир 12–18 қазан аралығында өтеді. Рыбакина Пекиндегі жарыстан кейін Азиядағы турнирлер сериясын осы қалада жалғастырады деп жоспарланған еді. Алайда жарақатына байланысты оған демалып, қалпына келу үшін уақыт қажет болды.
Қазақстандық теннисші өзінің ойынын күткен жанкүйерлеріне үндеу жолдап, қолдауы үшін алғыс айтты.
«Менің өнер көрсетуімді асыға күткен жанкүйерлерден кешірім сұраймын. Демалып, қалпыма келу үшін біраз уақыт қажет. Түсіністік танытып, үнемі қолдау көрсеткендеріңізге рақмет. Келесі жылы кездескенше», – деді Рыбакина.
Спортшының үндеуін турнирдің баспасөз қызметі жариялады.
Пекиндегі жарысты екінші айналымда аяқтады
Бұған дейін Рыбакина Пекинде өткен WTA 1000 турнирінің екінші айналымында Армения атынан өнер көрсететін Алина Чараеваға есе жіберді.
Қазақстандық теннисші алғашқы сетті 6:3 есебімен жеңгенімен, кейінгі екі партияда 4:6 және 3:6 есебімен ұтылды. Осылайша, үшінші айналымға өте алмай, жарысты ерте аяқтады.
