Ақтау жағалауынан әлсіреген итбалық табылды
Иттерімен серуендеп жүрген қала тұрғыны итбалықты байқап қалған.
«Бриз» яхта клубының маңындағы Жартас соқпағында куәгерлер жағаға шығып, ұзақ уақыт суға қайтпаған итбалықты байқаған. Мамандар мұндай мінез-құлық жануардың денсаулығында күрделі мәселе бар екенін білдіруі мүмкін екенін айтты, деп хабарлайды Tizgin.kz порталы Lada.kz-ға сілтеме жасап.
Жергілікті тұрғын Елена өзінің айтуынша, иттерімен серуендеп жүрген кезде итбалықты байқап қалған.
«Оны ең алғаш менің иттерім көріп, қорқып, үре бастады. Мен жақындап бардым, ол маған өте әлсіз әрі қорғансыз болып көрінді», – дейді ол.
Әйелдің айтуынша, ол жануарға көмектесуге тырысқан, бірақ итбалық агрессивті болған.
«Мен оны суға қарай сәл жылжытқым келді, тіпті сипап көрдім, бірақ ол ысылдап, тістерін көрсетті. Мен қорқып, алыстап кеттім», – дейді ол.
Осыдан кейін итбалық суға қарай сәл жылжығанымен, жағалауда жатып қалған.
Жағдайға Qazaq Balyk өңірлік филиалының директоры Данияр Акимжанов пікір білдірді.
Оның айтуынша, бейнежазбаға қарағанда, жануар қатты әлсіреген болуы мүмкін.
«Тығырыққа тірелген жағдайда итбалықтар адамдарға жақындап, көмек сұрағандай болады. Әдетте олар мұндай жерлерден аулақ болып, адамдардан қашық жүргенді жөн көреді», – дейді маман.
Сондай-ақ, ол итбалыққа жақындауға болмайтынын атап өтті.
«Жануар қаншалықты қорғансыз көрінсе де, ол қауіпті аурулардың тасымалдаушысы болуы мүмкін. Мұндай жағдайда балық инспекциясына, Каспий итбалығын зерттеу және оңалту орталығына немесе итбалықтарға арналған табиғи резерватқа хабарлау қажет», – дейді маман.
Егер көзге көрінетін жарақаттары болса, 102 нөмірі арқылы полицияға жүгіну керек.
Маман Каспий итбалығы 2020 жылдан бері Қызыл кітапқа енгізілгенін еске салды.