15 қарашада Қазақстанның 11 облысында тұман түсіп, тоғыз облысында жауын-шашын мен көктайғақ күтіледі. Төтенше жағдайлар министрлігі тұрғындарды жолда сақ болуға шақырды, деп хабарлайды Tizgin.kz ведомствоға сілтеме жасап.
Қай өңірлерде тұман мен көктайғақ күтіледі
ТЖМ мәліметінше, Түркістан, Қызылорда, Маңғыстау, Ақмола, Солтүстік Қазақстан, Павлодар, Қарағанды, Шығыс Қазақстан, Алматы, Жамбыл және Батыс Қазақстан облыстарында тұман түсуі мүмкін.
Ақмола, Солтүстік Қазақстан, Павлодар, Қарағанды, Шығыс Қазақстан, Ақтөбе, Қостанай, Батыс Қазақстан және Атырау облыстарында жауын-шашын жауып, көктайғақ болады деп болжанып отыр.
Сегіз облыста жел күшейеді
Батыс Қазақстан, Атырау, Маңғыстау, Солтүстік Қазақстан, Ақтөбе, Қостанай, Алматы және Жамбыл облыстарында жел күшейеді деп күтіледі.
ТЖМ жүргізушілер мен жаяу жүргіншілерге ескерту жасады
Министрлік жүргізушілерге белгіленген жылдамдықты сақтап, алдағы көлікпен арақашықтықты ұлғайтуға және көліктің бағытын күрт өзгертпеуге кеңес берді. Көктайғақ кезінде жаяу жүргіншілер өткеліне жақындағанда ерекше сақ болған жөн.
ТЖМ жаяу жүргіншілерді де жолдан өткенде абай болуға шақырды. Ведомство ауа райы қолайсыз болса, алыс сапарды мүмкіндігінше кейінге қалдыруға кеңес береді.
