Үкіметтегі баспасөз мәслихатында журналистердің бірі ауыл шаруашылығы министрі Айдарбек Сапаровтан «туған-туыстарыңыз мемлекеттен субсидия алып отыр ма?» деп сұрады, деп хабарлайды Tizgin.kz.
Сапаровқа бұл сұрақ ұнамай қалған сыңайлы. Ол бұл сауалды «жеке сұрақ» деп атап, оған қаншама рет жауап бергенін, соны интернеттен көре алатынын айтты.
«Менің ол жерге ешқандай қатысы жоқ. Құрылтайшы емеспін. Олар өздерінің жұмысын жасап жатыр. Ол жерде де пайшылар бар. Әңгіме көтергендерін естідіңіз бе? Мен ол жерге қатыспаймын да, білмеймін де, кіріскім де келмейді», – дейді Сапаров.
“Неге бұл сұрақты жеке сұрақ деп есептейсіз?” деген сұраққа Сапаров “бұған дейін жауап бергенін, БАҚ-тың бәрінде жауабы барын” айтты.
Еске сала кетейік, бірнеше жыл бұрын Shishkin_like телеграм-арнасы министрдің ағасы Алтынбек Сапаров 2019-2020 жылдары бюджеттен жалпы сомасы 713,5 миллион теңге алғанын жазған еді.
