Тамыз айында Қазақстаннан бензинді заңсыз әкету әрекеттерінің саны азайды
Бір ай ішінде шекарашылар жалпы құны 3,3 млрд теңгені құрайтын тауарлар мен валютаны заңсыз өткізудің алдын алды.
Тамыз айында ҰҚК Шекара қызметі Қазақстан шекарасы арқылы жанар-жағармай материалдарын заңсыз өткізуге қатысты 1061 деректің жолын кесті. Оның жалпы көлемі 159 тоннадан асты. Бұл туралы комитеттің баспасөз қызметі мәлімдеді, деп хабарлайды Tizgin.kz.
Шілдемен салыстырғанда мұндай фактілердің саны 747-ге немесе шамамен 1,7 есеге азайған. Шілде айында шекарашылар жалпы көлемі 150 тоннадан асатын жанар-жағармай материалдарын заңсыз өткізуге қатысты 1808 деректі анықтаған. Олардың құны 33,4 млн теңгені құрады.
Бұл ретте тамыз айында заңсыз өткізудің жолы кесілген жанармай көлемі 6 пайыздан астамға өскен.
Тамыз айындағы заңсыз тасымал фактілері
Жаздың соңғы айында шекарашылар шекара арқылы тауарлар мен жүктерді заңсыз өткізудің 2089 дерегінің алдын алды. Оның ішінде:
- 30 – есірткі заттарын заңсыз өткізу фактісі;
- 68 – қару мен оқ-дәрілерді заңсыз өткізу фактісі;
- 1061 – жалпы көлемі 159 тоннадан асатын жанар-жағармай материалдарын заңсыз өткізу фактісі;
- 751 – жалпы құны 1,8 млрд теңгеден асатын халық тұтынатын тауарларды заңсыз өткізу фактісі;
- 179 – жалпы сомасы 1,5 млрд теңгеден асатын валютаны заңсыз өткізу фактісі.
5,5 мыңнан астам құқық бұзушы ұсталды
Сондай-ақ өткен айда шекарашылар Қазақстан заңнамасын бұзған 5588 адамды ұстады. Олардың ішінде 4907-сі шетел азаматтары.
Каспий теңізі акваториясында 61 браконьерлік фактісінің жолы кесілді. Заңсыз балық аулау құралдары мен бекіре тұқымдас балықтар тәркіленді. Алдын алған залалдың жалпы көлемі 561 млн теңгеден асты.
63 қылмыстық іс қозғалды
Шекара қызметі 63 қылмыстық іс қозғады. Қазіргі уақытта тергеу амалдары жалғасып жатыр.
Сонымен қатар өндірісте 4886 әкімшілік іс болған. Салынған айыппұлдардың жалпы сомасы 40 млн теңгеден асты.
Анықталған басқа да құқық бұзушылықтар бойынша материалдар құқық қорғау органдары мен соттарға жолданды.