Шу ауданындағы «Jibek Joly» арнайы экономикалық аймағында орналасқан «ARRIVO INDUSTRY» кәсіпорны өндірістік қызметін бастауға дайын, деп хабарлайды Tizgin.kz.
Жобаның құны – 300 миллион теңге.
Кәсіпорын жылына 200 мың сызықтық метр «сэндвич-панель» типті сыртқы қоршау құрылымдары мен 6 мың тонна металл конструкцияларын өндіреді.
Жоба аясында 30 жаңа жұмыс орны құрылып, қызметкерлердің жалақысы 200 мыңнан 500 мың теңгеге дейін болады.
Жаңа өндіріс өңірдің өнеркәсіптік әлеуетін арттырып, инвестиция тартуға және жергілікті тұрғындарды тұрақты жұмыспен қамтуға серпін береді.
Импортты азайтып, құрылыс материалдарының қолжетімділігін арттырады
«ARRIVO INDUSTRY» кәсіпорнының іске қосылуы Жамбыл облысындағы құрылыс материалдары өндірісінің ауқымын кеңейтуге мүмкіндік береді. Зауыт шығаратын сэндвич-панельдер мен металл конструкциялары өндірістік цехтар, қоймалар, логистикалық орталықтар, сауда орындары және ауыл шаруашылығы нысандарын салу кезінде кеңінен қолданылады.
Кәсіпорынның жылына 200 мың сызықтық метр сэндвич-панель және 6 мың тонна металл конструкциясын өндіруі ішкі нарықтағы сұраныстың бір бөлігін отандық өніммен өтеуге жол ашады. Соның нәтижесінде шетелден әкелінетін құрылыс материалдарына тәуелділік төмендеп, импортты алмастыру үдерісі жанданады.
Жергілікті өнімнің тағы бір артықшылығы – тапсырысты жеткізу мерзімінің қысқаруы. Құрылыс компаниялары қажетті материалды шетелден ұзақ уақыт күтпей, отандық кәсіпорыннан тікелей сатып ала алады. Бұл көлік пен логистика шығынын азайтып, құрылыс жобаларын белгіленген мерзімде аяқтауға ықпал етеді. Жаңа зауыттың пайдасы мұнымен шектелмейді. Кәсіпорынның жұмысы металл өңдеу, жүк тасымалы, қойма қызметі, жөндеу және техникалық қызмет көрсету секілді сабақтас салаларға да қосымша сұраныс қалыптастырады. Ал тұрақты жұмыс орындарының ашылуы жергілікті мамандардың ауданнан көшпей-ақ табыс табуына мүмкіндік береді.
