Қазақстан инженері әрі кәсіпкері, TaiSan стартап компаниясының иесі Санжар Тайжан Ұлыбритания үкіметінен DRIVE35 бағдарламасы аясында гранттық қаржыландыру алғанын хабарлады, деп жазады Tizgin.kz.
ЖОБА НЕНІ КӨЗДЕЙДІ
Бұл жоба CPI (процестердегі инновациялар орталығы) ұйымымен әріптестікте жолға қойып, электролит пен аккумулятор элементтерін өндіруді автоматтандыруға бағытталған. Жобаның жалпы құны шамамен 1 млн фунт стерлинг.
Жоба Ұлыбританияның Бизнес және сауда департаменті тарапынан Advanced Propulsion Centre UK (APC) және Innovate UK ұйымдарымен бірлесіп жүзеге асырылады. DRIVE35 бағдарламасы – Ұлыбритания үкіметінің нөлдік шығарындылы көлік жүйесін дамытуға және автомобиль жеткізу тізбегін нығайтуға бағытталған £4 млрд көлеміндегі бастамасының бір бөлігі.
TaiSan жетекшілік ететін бұл жоба электролит құрамын әзірлеу мен аккумулятор элементтерін өндіруге арналған озық автоматтандыру шешімдерін әзірлейді. Бұл – келесі буын энергия сақтау технологияларын кең ауқымда енгізу үшін аса маңызды компоненттер. Өндіріс тиімділігін, сапасын және ауқымын арттыру арқылы жоба Ұлыбританияның нөлдік шығарындылы көлікке көшуі үшін маңызды аккумулятор технологияларын коммерцияландыруды жеделдетуді көздейді.
«Бұл жоба – Ұлыбританияда ауқымды әрі жоғары өнімді аккумулятор өндірісін қалыптастыру жолындағы маңызды қадам. CPI-мен серіктестік арқылы біз процестердегі инновация мен автоматтандырудағы терең тәжірибемізді біріктіріп, электролит пен аккумулятор өндірісіндегі негізгі түйткілдерді шешуге мүмкіндік алып отырмыз. DRIVE35 бағдарламасының қолдауы инновациядан өнеркәсіптік іске асыруға жылдам көшуге жол ашады ӘРІ Ұлыбританияның жаһандық аккумулятор жеткізу тізбегіндегі орнын нығайтады», – дейді Санжар Тайжан.
Advanced Propulsion Centre UK (APC) ұйымының бас директоры Иэн Констанс осы жоба жайлы былай дейді.
«Бүгін жарияланған жобалар Ұлыбританияның нөлдік шығарындылы көлікке көшуде көшбасшы болуға деген табандылығын көрсетеді. Үкіметтің DRIVE35 гранттары арқылы біз әлемдік деңгейдегі инновацияларды өндірістік қуатқа айналдырып отырмыз. Бизнес және сауда департаменті мен Innovate UK серіктестігінде біз өндірушілерді қолдап, шағын және орта бизнесті күшейтіп, ұлттық жеткізу тізбегін нығайтамыз».
Бұл көп миллион фунттық қолдау пакеті тек технологияға инвестиция емес – бұл болашақ таза көлік индустриясын айқындайтын адамдарға, дағдыларға және компанияларға салынған инвестиция. Біз бірге бәсекеге қабілетті, тұрақты әрі орнықты автомобиль саласының негізін қалап жатырмыз», – деді.
Аталған қаржыландыру TaiSan компаниясының ғылыми-зерттеу және өндірісті кеңейту жұмыстарын қолдап, аккумулятор өндіріс орындарында енгізілетін автоматтандырылған жүйелерді дамытуға мүмкіндік береді. Бұл шығындарды азайтып, өндіріс тұрақтылығын арттырады.
TaiSan компаниясы CPI және саланың басқа да серіктестерімен тығыз жұмыс істеп, маңызды инновацияларды жүзеге асырып, Ұлыбританияның нөлдік баланс (net-zero) мақсаттарына қолдау көрсетеді.
