Салтанат Нүкенованың өліміне қатысты іс бойынша сотталған Бақытжан Байжанов өзін толық ақтауды сұрады, деп хабарлайды пишет Tizgin.kz Tengrinews.kz-ке сілтеме жасап.
ҚОРҒАУШЫ НЕ АЙТТЫ
Сот жүйесінің кассациялық соттар департаменті мәліметінше, сотталған Бақытжан Байжановтың мүддесін қорғау мақсатында адвокат Секеров пен қорғаушы Күлдеева кассациялық шағым түсірген.
Адвокат Секеров бірінші сатыдағы сот үкімі мен апелляциялық шешім күшін жойып, Байжановты толық ақтауды сұрайды. Оның ойынша, сотталған адамның әрекеттерінде қылмыс құрамы жоқ. Ал қорғаушы Күлдеева толық ақтауды талап етпей, жаза мерзімін жеңілдетуді өтінген.
Кассациялық шағымда адвокат А.Ж. Секеров Астана қаласының мамандандырылған ауданаралық қылмыстық істер жөніндегі сотының 2024 жылғы 13 мамырдағы үкімі мен Астана қалалық соты қылмыстық істер жөніндегі сот алқасының 2024 жылғы 26 маусымдағы қаулысын жоюды сұрайды. Сонымен қатар ол Байжанов Б.А.-ны Қылмыстық кодекстің 432-бабы («Қылмысты жасыру») бойынша қылмыстық құқық бұзушылық құрамының болмауына байланысты толық ақтауды талап еткен.
Қазір іс кассациялық сот өндірісінде. Сот отырысы 2026 жылғы 14 мамырға белгіленген.
МӘН-ЖАЙЫ
Бахытжан Байжанов – бұрынғы Ұлттық экономика министрі Қуандық Бишімбаевтың бауыры. Ол Салтанат Нүкенованың өліміне қатысты іс бойынша қылмысты жасырғаны үшін сотталған.
2024 жылғы 13 мамырда Астананың мамандандырылған ауданаралық қылмыстық соты оны Қылмыстық кодекстің 432-бабы бойынша кінәлі деп танып, 4 жылға бас бостандығынан айырған.
Байжанов 2023 жылғы 12 қарашада ұсталып, тергеу изоляторында болған. Бұл кезеңде бір күн бір жарым күн ретінде есептеледі. Қазіргі уақытта ол жазасын Степногорск қаласындағы орташа қауіпсіздік мекемесінде өтеп жатыр.
