Қазақстанда жұмыс істеп тұрған үш мұнай өңдеу зауыты кеңейтіліп, қуаты жылына 29,2 млн тоннаға дейін ұлғайтылады. Бұған қоса, қуаты 10 млн тонна болатын жаңа зауыт іске қосылса, елдегі мұнай өңдеудің жалпы көлемі жылына шамамен 39 млн тоннаға жетеді, деп хабарлайды Tizgin.kz.
Бұл туралы Үкімет отырысында энергетика министрі Ерлан Ақкенженов мәлімдеді.
Үш зауыттың қуаты 11,2 млн тоннаға артады
Министрдің айтуынша, Қазақстанда мұнай өңдеу саласын кең ауқымда жаңғырту жұмыстары жүргізіліп жатыр. Қазір жұмыс істеп тұрған үш зауыт кеңейтілгеннен кейін олардың жиынтық қуаты жылына 18 млн тоннадан 29,2 млн тоннаға дейін артады.
Сонымен қатар жылына 10 млн тонна мұнай өңдей алатын жаңа зауыт салу жоспарланған. Осы жоба жүзеге асса, Қазақстандағы мұнай өңдеу қуаты шамамен 39 млн тоннаға жетпек. Бұл қазіргі көрсеткіштен екі еседен астам көп.
Алайда өндірістік қуатты ұлғайту тек жаңа қондырғылар мен инфрақұрылым салумен шектелмейді. Кәсіпорындарды толық қуатында жұмыс істету үшін салаға қосымша білікті мамандар қажет болады.
Жаңа кәсіпорындарға кадр қалай даярланады
Ерлан Ақкенженов өндіріс көлемінің өсуі мұнай өңдеу саласындағы мамандарға деген сұранысты едәуір арттыратынын атап өтті.
Осыған байланысты Кәсіптік біліктілік жөніндегі салалық кеңес «Мұнай мен газды қайта өңдеу және өткізу» бағыты бойынша сегіз кәсіптік стандартқа кіретін 29 кәсіп карточкасын жаңартып жатыр.
Мұнай өңдеу саласын дамытудың 2025–2040 жылдарға арналған тұжырымдамасында кадр даярлаудың кешенді жүйесі қарастырылған. Құжатта жаңа өндірістік қуаттар іске қосылғанға дейін қажетті мамандарды алдын ала даярлау көзделеді.
Сондай-ақ білікті жұмысшыларды тартуға қолайлы жағдай жасау және қазіргі әрі болашақ кәсіпорындарға қажет кадрларды жұмыс істеп тұрған өндірістік алаңдарда тікелей оқыту жоспарланған. Осылайша, зауыттардың қуатын арттыру мен маман даярлау ісі қатар жүргізілмек.
