Экспорт өсімі байқалса да, жеткізілім көлемі әлі де қалыпты деңгейден төмен, деп хабарлайды Tizgin.kz BES.media-ға сілтеме жасап.
ДИРЕКТОР НЕ ДЕЙДІ
2026 жылғы наурызда Қазақстан Каспий құбыр консорциумы (КТК) жүйесі арқылы 474 мың тонна мұнай жөнелтуді жоспарлап отыр. Бұл бағыт келесі айда да қазақстандық шикізат экспортының негізгі арнасы болып қала береді. Бұл туралы «КазТрансОйл» компаниясының тасымалдау департаментінің директоры Исламдаут Акубаев мәлімдеді.
Энергетика министрлігі бекіткен кестеге сәйкес, наурыз айында мұнай экспортының негізгі бөлігі дәл осы ККҚ жүйесі арқылы жүзеге асырылады.
2026 жылғы наурызға жоспарланған экспорт көлемі:
- 474 мың тонна – КТК жүйесі арқылы;
- 210 мың тонна – Адамова Застава бағытына;
- 138 мың тонна – Баку – Тбилиси – Джейхан мұнай құбыры маршрутымен;
- 94 мың тонна – Батуми порты арқылы теңізге жөнелтілетін Теңіз мұнайы;
- қосымша 100 мың тонна Усть-Луга порты бағытына жіберілмек.
МҰНАЙ КӨЛЕМІ ТӨМЕНДЕГЕН
Сондай-ақ, сәуір айына арналған нақты экспорт жоспары Энергетика министрлігінің жаңа кестесі жарияланғаннан кейін бекітіледі.
Компания өкілінің айтуынша, қаңтар мен ақпан айларында Батуми арқылы мұнай тиеу іс жүзінде жүргізілмеген. Бұл бағыттағы жеткізілімдер тек наурызда қайта жанданады.
Сонымен қатар, қазақстандық мұнай экспортының басты арнасы ретінде Каспий құбыр консорциумы қала береді. «КазТрансОйл» деректеріне сәйкес, ақпан айында ККҚ жүйесіне жеткізілген мұнай көлемі қаңтармен салыстырғанда төмендеген:
- 2026 жылғы қаңтар – 463 мың тонна;
- 2026 жылғы ақпан – 375 мың тонна.
Осылайша, жеткізілім шамамен 90 мың тоннаға азайған. Уақытша ауытқуларға қарамастан, ККҚ қазақстандық мұнайды әлемдік нарыққа шығаруға оқталып отыр.
