Жаңалықтар

Қазан айында Қазақстанда инфляция деңгейі тағы да төмендеді

Қазақстанда инфляцияның өсу қарқыны бәсеңдеп келеді. 2026 жылғы қазан айының қорытындысы бойынша жылдық инфляция қыркүйектегі 9,3%-дан 9,2%-ға дейін төмендеді. Ал айлық инфляция 0,1 пайыздық тармаққа баяулап, 0,5%-ды құрады, деп хабарлайды Tizgin.kz Ұлттық статистика бюросына сілтеме жасап.

Қазан айында қандай өнімдер арзандады

Ресми мәліметке сәйкес, қазан айында жүзім 10%-ға, пияз 9,8%-ға, қант 9,5%-ға, гүлді қырыққабат 9%-ға, алма 6,2%-ға, брокколи 4,6%-ға, ал алмұрт 3,5%-ға арзандаған. Сондай-ақ жасымықтың бағасы 2,3%-ға, бидай жармасы 2,1%-ға, қой еті 1,4%-ға төмендеді. Бал мен қантты печенье 0,6%-ға, күнбағыс майы мен шоколад пастасы 0,1%-ға арзандаған. Азық-түлікке жатпайтын тауарлар арасында блендер бағасы 6,7%-ға, модемдер мен роутерлер 4,2%-ға, микротолқынды пештер 2,4%-ға төмендеді. Бұдан бөлек, жабыспайтын жабыны бар табалар, балалар сабыны мен тіс пастасы да біршама арзандаған.

Бір жылда қандай тауарлардың бағасы төмендеді

2025 жылғы қазанмен салыстырғанда қиярдың бағасы 34,4%-ға, банан 12,4%-ға, лимон 11,1%-ға, сарымсақ 10,2%-ға арзандаған. Жүзім, киви, тәтті бұрыш пен пияздың да бағасы төмендеді. Азық-түлікке жатпайтын тауарлар арасында Қазақстанда құрастырылған жеңіл автомобильдер 17,3%-ға, электр бұрғылары мен бұрауыштар 10,5%-ға, электр еттартқыштар 3,9%-ға арзандады. Дегенмен жалпы алғанда бір жыл ішінде азық-түлікке жатпайтын тауарлардың бағасы 10,4%-ға, ақылы қызметтер 10,3%-ға, ал азық-түлік өнімдері 7,6%-ға қымбаттаған.

Ұлттық статистика бюросының мәліметінше, инфляция деңгейі ай сайын 537 тауар мен қызметтің бағасы негізінде есептеледі. Қазан айындағы көрсеткіш жалпы баға өсімінің баяулағанын аңғартады.

Back to top button