Алматы облысында Қаскелең қаласындағы мешіт аумағында жасөспірімдерді ұру дерегі бойынша тергеу жүріп жатыр. Әлеуметтік желіде тараған бейнежазбадағы ұстаз қызметінен босатылған. Облыстық полиция департаменті оның әрекетіне заңға сәйкес құқықтық баға берілетінін хабарлады, деп хабарлайды Tizgin.kz.
Бейнежазба 2 маусымда түсірілген
Әлеуметтік желіде мешіт ұстазының жасөспірімдерге қол көтергені көрінетін видео тарады. Полицияның мәліметінше, тексеру барысында бейнежазбаның 2 маусымда түсірілгені анықталған. Қазір кәмелетке толмағандар мен олардың ата-аналарының қатысуымен қажетті процестік әрекеттер жүргізіліп жатыр.
«Кәмелетке толмағандармен және олардың ата-аналарымен қажетті процестік әрекеттер жүргізіліп жатыр. Тергеу бақылауға алынған. Ұстаздың әрекетіне заңға сәйкес құқықтық баға беріледі», – делінген Алматы облыстық полиция департаментінің хабарламасында.
Ұстаз қызметінен босатылған
Kazinform мәліметінше, бейнежазбадағы Дүйсенхан Нұрберді мешіт ұстазы қызметінен босатылған. Оның қызметінен босатылғанын Қазақстан мұсылмандары діни басқармасының Алматы облыстық өкілдігі де хабарлаған. Өкілдік ұстаздың әрекеті педагогикалық әдеп пен ұстаздық қызметке қойылатын талаптарға сәйкес келмейтінін мәлімдеген. Жасөспірімдердің ата-аналары ұстазға қатысты талап-шағымдары жоқ екенін жазбаша мәлімдеген.
Полиция оқиғаға қатысты тергеудің жалғасып жатқанын хабарлады. Ұстаздың әрекетіне құқықтық баға тергеу аясында беріледі.
