«Олимпиаданың екі мәрте жеңімпазы бола алар едім»: Елеусінов мәлімдеме жасады
Қазақстандық боксшы Данияр Елеусінов Олимпиадаға қатысуына кедергілер жасалғанын мәлімдеді.
Оның айтуынша, Қазақстан бокс федерациясының президенті Шахмұрат Мүтәліп оның Олимпиада ойындарына қатысқанын қалаған, алайда басқа адамдардың араласуы салдарынан ол Токио және Париж Олимпиадаларына бара алмай қалған, деп хабарлайды Tizgin.kz.
Елеусіновтің сөзінше, осының кесірінен ол Олимпиада чемпионы атану мүмкіндігінен екі рет айырылған.
«Бәрі менен Токиодағы, Париждегі Олимпиадаларға неге қатыспағанымды сұрайды. Өйткені мені ешкім Токиодағы Олимпиададан көргісі келген жоқ, ал Парижде өткен Олипиададан көргісі келді, бірақ Парижде Олимпиадаға қатысуға маған кедергі келтірді. Шахмұрат Мүтәліп менің қатысқанымды қалады, ал басқа адамдар оған кедергі болды. Міне, адам лицензия алды да, бірінші ойында жеңіліп қалды. Мен Олимпиаданың екі мәрте жеңімпазы бола алатын едім. Бар жауабым – осы», – дейді ол.
Еске салсақ, Данияр Елеусінов 2016 жылы Рио-де-Жанейрода өткен Олимпиада ойындарында алтын медаль жеңіп алған болатын. Бұл – Қазақстан боксы үшін Олимпиададағы соңғы алтын жүлде.