Артында жесір әйелі, жетім ұл-қыздары қалды: Жамбыл облысы тұрғынын атып өлтірді деген күдікті ұсталды
Сотқа дейінгі тергеу амалдары басталды
Әлеуметтік желіде Жамбыл облысының тұрғыны “қылмыстық топ мүшелері ағамды атып кетті” деп жазба қалдырып, әділ тергеуді талап етіп көмек сұрады, деп хабарлайды Tizgin.kz.
«Ағамды атып өлтірді»
«Менің ағам Дүкенбай Ахметті түнгі сағат үштер шамасында Тұрар Рысқұлов ауданы Луговое ауылы Пушкин көшесінде осы ауданның қылмыстық топ мүшелері суық қарумен атып өлтірді. Құрметті ҚР Президенті Қасым-Жомарт Тоқаев, сізден көмек сұраймыз. Осы уакытқа дейін заң кызметкерлері мән-жайды түсіндірмей отыр. Қылмыскерлер жауапкершіліктен кұтылып кетпесінші. Атқан азаматтардың есімдері барлығымызға белгілі. Артында жесір әйелі, жетім ұл-қыздары қалды», – деп жазды әлеуметтік желіде ayaulymrff атты қолданушы.
Полиция: кісі өлтіру ісі бойынша күдікті қамауға алынды
Осы мәселеге қатысты Жамбыл облысының полиция департаменті Tizgin.kz редакциясының сауалына жауап берді.
«Аталған дерек бойынша қылмыстық кодекстің «кісі өлтіру» бабымен сотқа дейінгі тергеу амалдары басталды. Полиция қызметкерлері күдіктіні анықтап, уақытша ұстау изоляторына қамады. Қазір қылмысты жан-жақты, толық тергеп-тексеруге бағытталған қажетті тергеу әрекеттері жүргізіліп жатыр. Қылмыстық-процессуалдық кодекстің 201-бабына сәйкес, тергеу мүдделеріне байланысты өзге мәліметтер жариялауға жатпайды», – делінген жауапта.