2026-2027 оқу жылына арналған мемлекеттік білім грантының иегерлері анықталды. Ғылым және жоғары білім министрлігі грант алған талапкерлердің бұдан әрі қандай әрекет жасауы керектігін түсіндірді, деп хабарлайды Tizgin.kz.
Грант куәлігін қайдан алуға болады
Білім грантын тағайындау туралы электронды куәлік grant.testcenter.kz сайтында қолжетімді. Талапкер оны сайттан жүктеп алып, жоғары оқу орнына құжат тапсырған кезде ұсына алады.
Грант куәлігінің берілуі оқуға қабылдау рәсімі толық аяқталды дегенді білдірмейді. Болашақ студент таңдаған университетінің қабылдау комиссиясына қажетті құжаттарды өткізуі керек.
Құжаттарды қай уақытқа дейін тапсыру қажет
Талапкерлер грант негізінде немесе ақылы бөлімде білім алу үшін жоғары оқу орындарына құжаттарын 25 тамызға дейін, бұл күнді қоса алғанда, тапсыруға тиіс. Құжат қабылдау тәртібі мен жұмыс кестесін алдын ала нақтылау үшін талапкер өзі таңдаған университеттің ресми сайтына немесе қабылдау комиссиясына хабарласқаны жөн.
Жоғары оқу орнына қандай құжаттар тапсырылады
Қабылдау комиссиясына мына құжаттарды ұсыну қажет:
- жеке куәлік;
- 3×4 көлеміндегі фотосурет;
- жалпы орта білім туралы аттестат;
- техникалық және кәсіптік білім беру ұйымдарының түлектері үшін диплом;
- №075/у нысанындағы медициналық анықтама;
- ер азаматтар үшін әскери тіркелу куәлігі;
- білім грантын тағайындау туралы электронды куәлік;
- жеңілдік берілетін санатқа жататынын растайтын құжаттар, егер бар болса.
Құжаттар толық тапсырылғаннан кейін жоғары оқу орны талапкерді студенттер қатарына қабылдау туралы бұйрық шығарады. Сондықтан грант иегерлеріне құжаттарын соңғы күнге қалдырмай, қабылдау комиссиясына ертерек өткізген дұрыс.
