АҚШ-тың Атланта қаласында өтіп жатқан G20 елдері сыртқы істер министрлерінің кездесуінде еуропалық дипломаттар Ресей сыртқы істер министрі Сергей Лавровпен бірге ортақ суретке түсуден бас тартты. Германия сыртқы істер министрі Йоханн Вадефуль мұндай шешімді Ресейдің Украинаға қарсы соғысының жалғасуымен түсіндірді, деп хабарлайды Tizgin.kz Deutsche Welle басылымына сілтеме жасап.
30 қазанда басталған кездесуде Еуропа елдерінің өкілдері Ресеймен қарым-қатынасты қалыпты деңгейге оралғандай көрсететін дипломатиялық рәсімдерге қатыспайтынын білдірді. Германия сыртқы істер министрі Йоханн Вадефульдің айтуынша, еуропалық мемлекеттердің ұстанымына байланысты жиынға қатысушылардың дәстүрлі ортақ фотосуреті түсірілмеуі мүмкін.
«Ресеймен қалыпты қарым-қатынас жоқ», – деді Германияның сыртқы істер министрі.
Вадефуль Ресей тарапымен байланыс орнату және келіспеушіліктерді талқылау қажет екенін мойындады. Алайда мұндай кездесулер Мәскеумен қарым-қатынас бұрынғы қалпына келгендей әсер қалдырмауы тиіс екенін атап өтті. Bloomberg агенттігінің жазуынша, G20 кездесулеріндегі ортақ фотосурет – практикалық маңызы жоқ, негізінен дипломатиялық сипаттағы дәстүрлі рәсім. Дегенмен ол әлемдік державалар өкілдерінің бірлігін көрсетуге арналған символдық қадам саналады.
Сондықтан еуропалық министрлердің ортақ фотосессиядан бас тартуы Ресейге қатысты саяси ұстанымның кезекті көрінісі ретінде бағалануы мүмкін.
Лавровтың өзі бұл әрекетті “басыну” деп бағалады.
АҚШ Лавровты келіссөзге шақырды
Еуропалық дипломаттардың қарсылығына қарамастан, Ресей сыртқы істер министрі Сергей Лавров G20 кездесуіне АҚШ тарапының шақыруымен қатысты. Биыл «Үлкен жиырмалыққа» төрағалық ететін АҚШ атынан Лавровты мемлекеттік хатшы Марко Рубио шақырған. Америкалық дипломаттың ресейлік әріптесімен екіжақты кездесу өткізуі жоспарланған.
AFP агенттігінің мәліметінше, бұл АҚШ президенті Дональд Трамптың Ресей басшылығымен диалогты жақсартуға бағытталған саясатына сәйкес келеді. Осылайша, Атлантадағы кездесу Батыс елдерінің Ресейге қатысты ұстанымындағы айырмашылықты тағы бір мәрте көрсетті. Вашингтон Мәскеумен тікелей келіссөз жүргізуге мүдделі болса, еуропалық мемлекеттер Ресеймен дипломатиялық қатынастың қалыпты сипат алғанын көрсететін қадамдардан бас тартып отыр.
Сонымен қатар Германия сыртқы істер министрі Украинадағы соғысты тоқтату мәселесін де көтерді. Вадефуль Мәскеуді Киевтің атысты тоқтату туралы ұсынысын қабылдауға шақыратынын мәлімдеді. Оның пікірінше, алғашқы қадам ретінде Қара теңіз акваториясында бітім орнату қажет. Германия дипломаты Ресеймен келіссөздердің маңызын жоққа шығармағанымен, нақты нәтижеге қол жеткізу үшін Мәскеу тарапынан тиісті шешімдер қабылдануы керектігін жеткізді.
Иран мәселесі де талқыланды
Атлантадағы кездесуде халықаралық қауіпсіздікке қатысты тағы бір маңызды мәселе – Иран төңірегіндегі шиеленіс сөз болды. Йоханн Вадефуль Иранға қатысты дағдарысты әскери жолмен шешу мүмкін емес екенін айтып, дипломатиялық келіссөздерге басымдық беруге шақырды. Бұл мәлімдеме АҚШ-тағы Конгреске аралық сайлаудан кейін Вашингтон мен Израильдің Иранға қайта соққы беруі мүмкін екені туралы ақпарат тараған тұста жасалды.
Германия сыртқы істер министрі Ормуз бұғазы арқылы кеме қатынасына қойылған шектеулерді тоқтату қажеттігін де атап өтті. Ормуз бұғазы әлемдік энергетика нарығы үшін стратегиялық маңызға ие. Бұл бағыт арқылы мұнай мен басқа да энергетикалық ресурстардың елеулі бөлігі тасымалданады. Осылайша, Атлантадағы G20 кездесуі Украинадағы соғыс, Ресеймен дипломатиялық байланыс және Таяу Шығыстағы қауіпсіздік мәселелері бойынша халықаралық пікір қайшылықтарын айқын көрсетті.
