De Lacure лақап атымен танымал рэпер Әнуар Баймұхаев «Мне стыдно» шоуының эфирге шықпаған шығарылымы төңірегіндегі талқыдан кейін көптің сынына ілікті, деп хабарлайды Tizgin.kz.
Оқиғаға жобаның жүргізушісі Зарина Байболованың мәлімдемесі түрткі болған. Ол рэпер қатысқан бір эпизодтың эфирге шықпағанын айтты, сөзінше, ол оқиға өзіне моральдық тұрғыдан ауыр тиген.
«Бір рэпер келіп, зорлық туралы оқиғаны айтып берді. Бұл шығарылым эфирге шықпады», – деді ол.
Жүргізуші нақты мәліметтерді ашып айтпаған. Алайда залда болған көрермендер оқиғаның өз нұсқасын жария етті.
Олардың айтуынша, De Lacure түсірілім барысында екі досы – Мироха мен Асхатпен бірге көшеде көмек сұраған әйелдің дауысын естігенін баяндаған. Кейін олар жарақат алған әйелді тауып, оған көмектесуге тырысқан. Алайда бір сәтте достарының бірі өзгелерден алыстауды сұрап, «әрі қарай мәселені өзі шешетінін» айтқан.
Көрермендердің сөзінше, осыдан кейін әйелге қатысты зорлық әрекеті болған. Ал қалғандары сол маңда болып, не болып жатқанын түсінген. Кейін желіде түсірілімнен үзінді бейне тарады. Пайдаланушылардың айтуынша, онда рэпер әйелдің баспанасыз болуы мүмкін екенін де айтқан.
De Lacure тағылған айыптарды жоққа шығарды. Ол зорлық-зомбылықты қатаң айыптайтынын және мұндай әрекеттерге еш қатысы жоқ екенін мәлімдеді. Рэпердің сөзінше, түсірілімде айтқан оқиғасы қате түсіндірілген.
Ол бұл оқиға мектеп кезінен қалған естелік екенін, сол кезде достарымен бірге белгісіз біреуден зардап шекті деген болжам бар әйелге көмектесуге тырысқанын айтты. Әртістің сөзінше, олардың тарапынан ешқандай зорлық әрекеті болмаған.
«Ол бізден көмек сұраған жоқ. Бір досым онымен оңаша қалды, әрі олардың арасында бәрі өзара келісіммен болды. Комиктер бірнеше рет нақтылап сұрады: бәрі өзара келісіммен болды ма деп. Мен иә, бәрі келісіммен болды деп жауап бердім», – деді рэпер.
Музыкант жанжалдың әлеуметтік желілердегі бұрмаланған пікірден туындағанын айтып, соның салдарынан БАҚ-та жалған ақпарат тарағанын алға тартты. Оның айтуынша, шоу жазбасы бұл сөздерін дәлелдей алады. Сонымен қатар De Lacure өзі таңдаған оқиғаның орынсыз болғанын мойындап, көрермендерден кешірім сұрады.
Кейін жүргізуші Зарина Байболова да жағдайға пікір білдірді. Оның айтуынша, түсірілім былтыр сәуірде Алматыда өтіп, оған жүзден астам көрермен қатысқан. Рэпердің әңгімесі көрермендер мен жоба командасын шошытқан. Байболова түсірілімді тоқтату қажет болғанын мойындады. Оның сөзінше, шығарылым тек даулы оқиғаға байланысты емес, жалпы сәтсіз деп танылғандықтан да эфирге шықпаған.
