Боксшы Әділбек Ниязымбетов қызметке тағайындалды

Олимпиаданың екі дүркін күміс жүлдегері Әділбек Ниязымбетов Қазақстан спортшылар кеңесінің даму жөніндегі директоры болып тағайындалды, деп хабарлайды Tizgin.kz. 

Жаңа қызметтегі міндеті қандай

Әділбек Ниязымбетовтің негізгі міндеттерінің бірі – отандық спортшыларға жаңа мүмкіндіктер жасауға ықпал ету. Осы бағытта ол кеңес жобаларын ілгерілетіп, ұйымның өңірлердегі жұмысын күшейтуге қатысады. Қазақстан спортшылар кеңесі спортшылардың мүддесін қорғауды, олардың ұсыныстары мен мәселелерін тиісті органдарға жеткізуді көздейді. Сондай-ақ спортты дамытуға бағытталған бастамаларды қолдайды.

Ұйым жұмысының тағы бір бағыты – спорттық мансабын аяқтаған азаматтарға демеу көрсету. Яғни кеңес спортшыларға жарысқа қатысып жүрген кезеңінде де, үлкен спорттан кеткеннен кейін де қолдау көрсетуді мақсат етеді.

Әділбек Ниязымбетовтың өмірбаяны

Әділбек Сәбитұлы Ниязымбетов 1989 жылғы 19 мамырда Өзбекстанның Нөкіс қаласында дүниеге келген. Қазақстан құрамасы сапында 81 келіге дейінгі салмақ дәрежесінде өнер көрсетті.

Боксшы 2012 жылы Лондонда және 2016 жылы Рио-де-Жанейрода өткен Олимпиада ойындарында күміс медаль жеңіп алды. Осылайша, қатарынан екі Олимпиадада финалға шығып, Қазақстан қоржынына екі күміс жүлде салды.

Ниязымбетов — сондай-ақ 2011 жылы Бакуде және 2013 жылы Алматыда өткен әлем чемпионаттарының күміс жүлдегері. Бұл жетістіктері оның спорттық өмірбаянында келтірілген.