Қазақстанда 2026 жылдың тоғыз айында ауылдық жерлердегі аса тапшы мамандықтар бойынша 230 дәрігерге 8,5 млн теңгеден көтерме жәрдемақы төленді. Осы кезеңде 223 маман баспанамен қамтамасыз етілген. Бұл туралы премьер-министр Олжас Бектенов депутат Дана Медеуованың медицина кадрларын қолдау және олардың құқықтарын қорғау жөніндегі сауалына берген жауабында хабарлады, деп жазады Tizgin.kz.
Ауылға барған дәрігерлерге қандай қолдау көрсетілді
Үкімет мәліметінше, биылғы тоғыз айда барлығы 737 дәрігер әлеуметтік қолдау алған. Оның ішінде 618 маманға көтерме жәрдемақы берілген. Ауылдағы аса тапшы мамандықтар бойынша 8,5 млн теңгелік төлем алған 230 дәрігер осы санатқа кіреді. Салыстыру үшін, 2025 жылы 1760-тан астам дәрігерге әлеуметтік қолдау көрсетіліп, 727-сі тұрғын үймен қамтылған. Ауылдық жерлердегі тапшы мамандықтар бойынша 529 дәрігерге 8,5 млн теңгеге дейін жәрдемақы төленген.
Жас мамандардың жұмыс орнында тұрақтап қалуына көмектесу үшін бейімдеу және тәлімгерлік орталықтары да құрылып жатыр. Олар еңбек жолын енді бастаған дәрігерлерге кәсіби қолдау көрсетуге тиіс. Ресми дерек бойынша, 2023-2025 жылдар аралығында елдегі дәрігер тапшылығы 20,4%-ға төмендеген. Алайда 2025 жылдың қорытындысында қажеттілік әлі де 3869,5 штаттық бірлікті құраған. Бұл көрсеткіш 2023 жылы 4863,75 болған. Ауылдық жерлерде тапшылық осы кезеңде 28,3%-ға азайып, 803,5 штаттық бірлікке түскен.
Мемлекеттік медициналық ұйымдардың дәрігерлермен жасақталу деңгейі – 92,3%, орта буын медицина қызметкерлерімен қамтылуы – 96,3%. Ауылда бұл көрсеткіштер тиісінше 93,9% және 97,9% болған.
Сонымен қатар Олжас Бектенов депутат көтерген мәселе назарға алынатынын айтады.
“Сіз бастамашылық еткен «Медицина қызметкерлерінің кәсіби мәртебесі және қызметіне берілетін кепілдіктер туралы» Қазақстан Республикасы Заңының жобасы заңнамада белгіленген тәртіппен Үкіметте қаралатын болады”, – делінген жауапта.
Медеуова дәрігерлердің мәртебесі мен құқықтарын қорғау мәселесін көтерді
Депутат Медеуова сауалында денсаулық сақтау саласының кадрлық әлеуетін нығайту және медицина қызметкерлерінің құқықтарын қорғау мәселелерін көтерген. Бектенов жауабында депутат бастамашылық еткен «Медицина қызметкерлерінің кәсіби мәртебесі және қызметіне берілетін кепілдіктер туралы» заң жобасы Үкіметте белгіленген тәртіппен қаралатынын хабарлады.
Премьер-министрдің мәліметінше, биыл медицина қызметкерлері мен жедел жәрдем жүргізушілеріне қатысты қорқыту және күш қолдану үшін қылмыстық жауаптылықты, сондай-ақ олардың өмірі мен денсаулығын сақтандыру шараларын көздейтін екі заң қабылданған.
Бұдан бөлек, 2024 жылдан бері медицина қызметкерлерінің кәсіби жауапкершілігін сақтандыру тетігі жұмыс істейді. Қазір осы тетік аясында 176,6 мыңнан астам маман сақтандырылған. Үкімет дәрігерлердің еңбек жағдайын жақсарту мен құқықтық қорғалуын күшейту жұмысы жалғасатынын мәлімдеді.
