Қазақстанның Бас прокуратурасы 23 тамызда өтетін Құрылтай депутаттарының сайлауына байланысты азаматтарды сайлау заңнамасын қатаң сақтауға шақырды, деп хабарлайды Tizgin.kz.
Ведомствоның мәліметінше, партиялық тізімдерді ұсыну және тіркеу 2–23 шілде аралығында жүргізіледі. Ал сайлауалды үгіт жұмыстары 23 шілде сағат 18:01-де басталып, 22 тамыз сағат 00:00-де аяқталады.
Үгітті мерзімінен бұрын бастауға болмайды
Бас прокуратура кандидаттарды тіркеу аяқталғанға дейін жүргізілетін кез келген сайлауалды үгіт заңсыз екенін ескертті. Мұндай әрекеттер үшін әкімшілік жауапкершілік қарастырылған.
Сондай-ақ кандидаттар мен саяси партиялардың атынан немесе оларды қолдау мақсатында қайырымдылық акцияларын өткізуге, сайлаушыларға ақша, тауар немесе қызмет ұсынуға тыйым салынады.
Ведомствоның мәліметінше, мұндай заңбұзушылықтар кандидаттың немесе партиялық тізімнің тіркеуінің күшін жоюға дейін алып келуі мүмкін.
БАҚ пен әлеуметтік желі қолданушыларына да ескерту жасалды
Бас прокуратура бұқаралық ақпарат құралдары мен онлайн-платформаларды кандидаттар туралы жалған немесе олардың ар-намысы мен абыройына нұқсан келтіретін ақпарат таратпауға шақырды.
Ведомство мұндай мәліметтерді жариялағаны үшін әкімшілік, ал жекелеген жағдайларда қылмыстық жауапкершілік көзделгенін еске салды.
Сауалнама жариялауға шектеу қойылады
Сонымен қатар Бас прокуратура қоғамдық пікірге сауалнама жүргізу және оның нәтижелерін жариялау тәртібіне назар аударды.
Заңға сәйкес, дауыс беруге бес күн қалғанда және дауыс беру күні сайлауға қатысты сауалнама нәтижелерін жариялауға тыйым салынады. Сондай-ақ жеке тұлғалардың сайлауға байланысты қоғамдық пікірге сауалнама жүргізуіне жол берілмейді.
