Ұлттық банктің шілдедегі шешімінен соң бірқатар қазақстандық банк теңгедегі депозиттердің мөлшерлемесін қайта қарады, деп хабарлайды Tizgin.kz.
Депозит мөлшерлемесі қайта қаралды
Кейбір банк табыстылықты базалық мөлшерлемеге сәйкес 0,25 пайыздық тармаққа төмендетсе, енді бірінде мөлшерлеме бірден 0,5-1 пайыздық тармаққа азайды.
Ұлттық банктің базалық мөлшерлемені 17%-дан 16,75%-ға дейін төмендету туралы шешімі 27 шілдеден бастап күшіне енді. Тамыз айының басында банктер жинақ, мерзімді және басқа да депозит түрінің жаңа шарттарын жариялай бастады.
Home Credit Bank депозиттер бойынша мөлшерлемені екі рет төмендетті. 1 тамыздан бастап үш айлық «Сберегательный Хоум+» депозитінің жылдық тиімді сыйақы мөлшерлемесі (ары қарай ЖТСМ) 20,5%-дан 20%-ға, номиналды мөлшерлемесі 18,65%-дан 18,24%-ға түсті.
Алты айлық «Сберегательный Хоум+ для VIP клиентов» депозитінің ЖТСМ-і де 20,5%-дан 20%-ға төмендеді.
Сонымен қатар банк «Стандартный 2.0» депозиттік сертификаттарының табыстылығын өзгертті. 12 айлық өнім бойынша ЖТСМ 19,5%-дан 19%-ға, 24 айлық мерзімде 18,75%-дан 18,25%-ға төмендеді.
Осылайша, алғашқы кезеңде төмендеу 0,5 пайыздық тармақты құрады.
VIP клиенттерге арналған депозит шарттары да өзгерді
Алайда 5 тамызда банк мөлшерлемелерді қайта қарады. Үш айлық «Сберегательный Хоум+» депозитінің ЖТСМ-і тағы 0,4 пайыздық тармаққа – 20%-дан 19,6%-ға төмендеді. Номиналды мөлшерлеме 18,24%-дан 17,9%-ға азайды.
VIP клиенттерге арналған алты айлық депозиттің шарттары да осылай өзгерді.
Нәтижесінде бірнеше күн ішінде бұл депозиттердің табыстылығы 20,5%-дан 19,6%-ға дейін, яғни 0,9 пайыздық тармаққа төмендеді.
Kaspi, Еуразиялық банк және Halyk Bank не өзгертті
Kaspi де Ұлттық банктің шешімінен кейін депозит шарттарын өзгертті. 5 тамыздан бастап «Накопительный Kaspi Депозит» бойынша тиімді мөлшерлеме 19% болды. Қазір депозит үш айға ашылады, ең төменгі салым сомасы – 100 мың теңге, ЖТСМ — 19%.
Еуразиялық банк мөлшерлемелердің өзгеретінін 4 тамызда жариялап, жаңа шарттарды 7 тамыздан бастап енгізді. Өзгеріс толықтыру мүмкіндігі бар үш айлық TURBO Депозит Накопительный өніміне қатысты болды.
Бұған дейін оның номиналды мөлшерлемесі 18,52%, ал ЖТСМ 20-20,02% аралығында еді. 7 тамыздан кейін номиналды мөлшерлеме 17,84%-ға, ЖТСМ 19,20–19,23%-ға дейін төмендеді. Осылайша номиналды табыстылық 0,68 пайыздық тармаққа, тиімді мөлшерлеме шамамен 0,8 пайыздық тармаққа азайды, – делінген мәліметте.
Halyk Bank депозиттердің барлығын бірдей өзгерткен жоқ. 10 тамыздан бастап үш айлық QORJIN депозитінің номиналды мөлшерлемесі 17,1%-дан 16,88%-ға, ЖТСМ 18,51%-дан 18,25%-ға төмендеді.
Алты айлық QORJIN депозитінің ЖТСМ-і 16,5%, 12 айлық депозиттікі 15,5% деңгейінде сақталды. «Максимальный», «Универсальный» және AQYL депозиттерінің мөлшерлемелері де өзгерген жоқ.
Кейбір банктің мөлшерлемені өзгерту әдісі бөлек
Bereke Bank-те «Күн Сайын» депозиті бойынша өзгермелі мөлшерлемені таңдауға болады. Ол Ұлттық банктің базалық мөлшерлемесі мен бекітілген спрэд негізінде есептеледі.
8 мамырдан бастап ашылған депозиттер үшін спрэд минус 2,98 пайыздық тармақты құрайды. Сондықтан базалық мөлшерлеме өзгерген кезде депозиттің табыстылығы да автоматты түрде өзгереді.
Базалық мөлшерлеме 17% болған кезде депозиттің номиналды мөлшерлемесі 14,02% еді. Ол 16,75%-ға төмендегеннен кейін депозит мөлшерлемесі де дәл сондай 0,25 пайыздық тармаққа түсіп, 13,77%-ды құрады. Қазір Bereke мұндай депозиттер бойынша номиналды өзгермелі мөлшерлемені 13,77%, ал ЖТСМ-ді 14,76% деп көрсетеді.
ForteBank те депозиттік өнімдерінің шарттарын бірнеше рет қайта қарады. 4 және 7 тамызда банк депозиттер желісіне өзгерістер енгізді.
7 тамыздан бастап толықтыруға болатын жинақ депозиті бойынша ЖТСМ үш айға – 19%, алты айға – 16,8%, 12 айға – 15,9% болып белгіленді. Толықтыру мүмкіндігі жоқ жинақ депозиттері бойынша көрсеткіштер тиісінше 19,1%, 16,9% және 16% болды.
4 тамыздан бастап ForteBank бірқатар кәдімгі депозиттердің мөлшерлемесін де өзгертті. Мысалы, ішінара ақша алуға болатын 13 айлық депозит бойынша номиналды мөлшерлеме 14,6%, ЖТСМ 15,72% болып белгіленді.
Freedom Bank депозит мөлшерлемелерін кезең-кезеңімен қайта қарап жатыр. 8 тамыздан бастап алты айлық «Копилка» депозитінің номиналды мөлшерлемесі 13,8% деңгейінде сақталғанымен, ЖТСМ 14,66%-дан 14,58%-ға төмендеді. Яғни тиімді мөлшерлеменің төмендеуі 0,08 пайыздық тармақты құрады.
9 тамыздан бастап бір айлық «Капитал» депозиті бойынша номиналды мөлшерлеме 16,94%, ЖТСМ 18% болып белгіленді.
Шарттары алдын ала жарияланды
Банк алдағы күндерге арналған жаңа шарттарды да алдын ала жариялады. 11 тамыздан бастап үш айлық «Капитал» депозитінің номиналды мөлшерлемесі 16,8%, ЖТСМ 18,01% болады. Ал бір жылдық «Стратегия» депозиті бойынша бұл көрсеткіштер тиісінше 13,6% және 14,48% деңгейінде белгіленген.
13 тамыздан бастап Freedom Bank «Капитал» депозиті бойынша бір және үш айлық мерзімге ЖТСМ-ді 18% деңгейінде белгілеуді жоспарлап отыр.
