Астана – Алматы бағытындағы ақылы тасжолдың бір бөлігінде жол жүру құны шамамен жеті есеге дейін өседі. Бұл туралы Tizgin.kz Көлік министрлігінің жаңа бұйрығына сілтеме жасап хабарлайды.
Ақылы жол учаскесі ұлғаяды
Бұған дейін ақылы жол тек Балқаш – Бурылбайтал арасындағы 91 шақырымды қамтыса, енді Қарағанды – Балқаш – Бурылбайтал бағытының басым бөлігі де ақылы болады.
Осыған байланысты Астана – Қарағанды – Алматы ақылы автожолының ұзындығы ұлғайып, бағыт 18 тарифтік аймаққа бөлінді. Әр аймақ үшін жеке тариф белгіленеді. Тарифтер айлық есептік көрсеткішпен (АЕК) есептеледі. 2026 жылы 1 АЕК – 4 325 теңге.
Министрлік мәліметінше, бүкіл бағыт бойынша жол ақысы көлік құралдарының барлық дерлік санаты үшін шамамен жеті есеге артады. Бұл ең алдымен ақылы учаскенің ұзартылуына байланысты. Сонымен қатар алдын ала төлем жасаған жүргізушілер жолдан өткеннен кейін төлейтіндерге қарағанда төмен тарифпен жүреді.
Кімдерге жеңілдік сақталады
Жергілікті тұрғындарға арналған абонементтердің бағасы өзгермейді. Жеңіл және шағын көліктер үшін ай сайынғы абонемент – 2 АЕК, ал ауыр жүк көліктері үшін 10 АЕК көлемінде сақталады.
Заң бойынша әрбір ақылы жолдың баламалы тегін бағыты болуы тиіс. Енді мұндай бағыт төрт түрлі жолдан, оның ішінде облыстық маңызы бар автожолдардан құралады. Алайда тегін жолдардың ұзындығы көбірек болуы және сапасы ақылы трассадан төмен болуы мүмкін.
Сонымен қатар баламалы жолы жоқ елді мекендердің тұрғындары жол ақысын төлеуден босатылады. Жаңартылған тізімге Қарағанды облысындағы Сарышаған, Торанғалық, Шұбартүбек, Гүлшат, Тасарал ауылдары, «Гольфстрим» демалыс аймағы, Приозерск қаласы, сондай-ақ Жамбыл облысындағы Қашқантеңіз, Мыңарал, Үлкен, Шығанақ және Бурылбайтал елді мекендері енгізілген.
Бұйрық ресми жарияланғаннан кейін 10 күн өткен соң күшіне енеді. Ақылы жолды пайдалану мерзімі бұрынғыдай 20 жыл болып қала береді.
