Анасымен сөзге келмей, пышақпен бірнеше рет соққы жасады деген күдікті Вьетнамнан Қазақстанға жеткізілді, деп хабарлайды Tizgin.kz.
Бас прокуратура не дейді
Бас прокуратура мен Ішкі істер министрлігінің Интерпол ҰОБ-сы қызметкерлері күдіктіні Вьетнамнан экстрадициялау үшін бірлесе әрекет еткен.
«Ол өткен жылдың қараша айында өз үйінде алкогольдік масаң күйде болып, жанжалдан кейін анасына пышақпен бірнеше рет соққы жасады деген күдікке ілінді», – деді Бас прокуратураның баспасөз қызметі.
Күдікті қай жерде ұсталды
Күдікті заңда белгіленген жауаптылықтан жалтару мақсатында қылмыстық қудалау органынан жасырынып жүрген. Осыған байланысты оған халықаралық іздеуге жарияланды.
«Жедел-іздестіру іс-шаралары барысында оның Вьетнам Социалистік Республикасының аумағында жүргені анықталып, маусым айында ол Дананг қаласында ұсталды, содан кейін Қазақстан Республикасы Бас прокуратурасының сұрауы бойынша елге экстрадицияланды», – делінген ақпаратта.
Қандай жаза күтіп тұр
Қазір күдікті уақытша ұстау изоляторына қамалды.
Оған тағылған қылмысты жасағаны үшін үш жылдан сегіз жылға дейінгі мерзімге бас бостандығынан айыру түріндегі жаза көзделген.
