Алматыдағы қалалық перинаталдық орталықта бір айдың ішінде екі бірдей үшем дүниеге келді. Бірінші үшем 14 тамызда, екіншісі араға 17 күн салып, 31 тамызда туған. Дәрігерлер мұндай жағдайдың сирек кездесетінін айтады, деп хабарлайды Tizgin.kz порталы Zakon.kz-ке сілтеме жасап.
Алғашқы үшемді 27 жастағы алматылық Мөлдір Советханова 14 тамызда дүниеге әкелген. Жүктілік табиғи жолмен болған. Екі ұл мен бір қыз жүктіліктің 32-аптасында кесарь тілігі арқылы туған.
Ата-анасы сәбилерге Айхан, Айбын және Айза деп ат қойған. Олардың туған кездегі салмағы тиісінше 1800, 1480 және 1400 грамм болған.
Шала туған сәбилер бірден жаңа туған нәрестелердің реанимация және қарқынды терапия бөліміне жатқызылған. Қазір дәрігерлер олардың жағдайын бақылап, салмақ қосуына көмектесіп жатыр.
Араға 17 күн салып, 31 тамызда осы перинаталдық орталықта тағы бір үшем дүниеге келді. Рахат Бигелдиева да жүктіліктің 32-аптасында екі қыз бен бір ұлды кесарь тілігі арқылы өмірге әкелген.
Сәбилерге Ахмет, Халима және Амина деген есімдер берілген. Ахметтің туған кездегі салмағы 1998 грамм, ал қыздардың салмағы 1412 және 1347 грамм болған.
Сәбилердің жағдайы қандай
Екінші үшем де қазір жаңа туған нәрестелердің реанимация және қарқынды терапия бөлімінде жатыр. Сәбилерге қажетті медициналық көмек көрсетіліп, CPAP аппараты арқылы инвазивті емес тыныс алуды қолдау терапиясы жүргізіліп жатыр.
Дәрігерлердің айтуынша, балалардың жағдайы тұрақтанғаннан кейін оларды реанимациядан басқа бөлімге ауыстыруға болады. Одан кейін сәбилер үйге шығаруға дайындалады.
«Жағдайлары тұрақтанғаннан кейін дәрігерлер оларды реанимация бөлімінен ауыстырып, кейін үйге шығаруға дайындай алады. Үшемнің дүниеге келуінің өзі сирек кездесетін жағдай саналады. Ал бір медициналық мекемеде бір айдың ішінде бірден екі үшемнің дүниеге келуі Алматы үшін ерекше жағдай болды», – деп хабарлады Қалалық перинаталдық орталық.
