Қаржы министрлігі «2027–2029 жылдарға арналған республикалық бюджет туралы» заң жобасын әзірледі, деп хабарлайды Tizgin.kz.
2027 жылы қандай көрсеткіштер өзгереді
Құжатқа сәйкес, 2027 жылғы 1 қаңтардан бастап мынадай көрсеткіштерді белгілеу ұсынылады:
- ең төменгі жалақы – 85 000 теңге (өзгеріссіз);
- айлық есептік көрсеткіш (АЕК) – 4 693 теңге (2026 жылы – 4 325 теңге);
- мемлекеттік базалық зейнетақының ең төменгі мөлшері – 38 622 теңге (2026 жылы – 35 596 теңге);
- ең төменгі зейнетақы мөлшері – 74 919 теңге (2026 жылы – 69 049 теңге);
- базалық әлеуметтік төлемдерді есептеуге арналған ең төменгі күнкөріс деңгейі – 55 173 теңге (2026 жылы – 50 851 теңге).
Зейнетақы қанша пайыз өседі
Сонымен қатар, заң жобасында жасына байланысты зейнетақы төлемдері мен еңбек сіңірген жылдары үшін төленетін зейнетақыны 2027 жылғы 1 қаңтардан бастап 8,5%-ға арттыру көзделген.
МӘМС жарнасына қандай өзгеріс енгізіледі
Бұдан бөлек, 2027 жылғы 1 қаңтардан бастап мемлекет міндетті әлеуметтік медициналық сақтандыру (МӘМС) жүйесіне төлейтін жарна мөлшерлемесін 2%-дан 2,2%-ға дейін ұлғайту ұсынылып отыр.
Заң жобасы 5 қыркүйекке дейін қоғамдық талқылау үшін «Ашық НҚА» порталында жарияланған.
